सडक निर्माण समयमै नसकिँदा काठमाडौं उपत्यकाको प्रमुख पर्यटकीय गन्तव्य नगरकोटको पर्यटन व्यवसाय प्रभावित भएको छ । सरकारले सन् २०२० लाई भ्रमण वर्षका रूपमा मनाउँदै छ, तर संघीय राजधानी नजिकैको मुख्य पर्यटकीय स्थल नगरकोट पुग्ने सडक नबन्दा आन्तरिक र बाह्य पर्यटक बढ्न सकेका छैनन् । भ्रमण वर्ष उत्सव चलिरहेका वेला पर्यटकले भरिभराउ हुनुपर्ने यहाँका होटेल र रेस्टुरेन्ट भने सुनसान जस्तै छन् । धुलाम्मे सडक र कमजोर पूर्वाधारका कारण नगरकोट आउने पर्यटकको संख्या बढ्न नसकेको पर्यटन व्यवसायीहरू बताउँछन् ।
सडक निर्माणमा भइरहेको ढिलाइले यहाँको पर्यटन व्यवसाय चौपट बनेको नगरकोट–नाल्दुम पर्यटन विकास समितिका उपाध्यक्ष धनबहादुर लामाले बताए । ‘पर्यटनका लागि आवश्यक पूर्वाधार विकासमा सरकारको कुनै चासो छैन, भ्रमण वर्ष मात्रै घोषणा गरेर पर्यटक कसरी आउलान् ?,’ उनी प्रश्न गर्छन् । व्यक्तिगत प्रयासबाट भ्रमण वर्षको पहिलो सूर्योदय नगरकोटबाट, नगरकोट पर्यटन महोत्सवजस्ता कार्यक्रमको तयारी भइरहेको उनले बताए ।
नगरकोट पुग्ने सडक जीर्ण मात्रै होइन यहाँ एउटै सार्वजनिक शौचालयसमेत छैन । व्यवस्थित बसपार्क छैन । खानेपानीको समेत अभाव छ । प्राकृतिक शौन्दर्यबाहेक पर्यटकलाई सुविधा पुग्ने अन्य पूर्वाधार नभएको व्यवसायीहरूको गुनासो छ । पर्यटन सूचना केन्द्रसमेत नहुँदा नगरकोट आउने पर्यटकको यकिन तथ्यांक पनि छैन । सडक आयोजनाप्रमुख जगत प्रजापतिका अनुसार अहिलेसम्म निर्माण कम्पनीले नाला र कल्भर्ट निर्माण गर्ने, टेवा पर्खाल र ह्युमपाइप लगाउने, सब–बेस राख्ने तथा माटो कटिङ सम्पन्न गरेको छ ।
गत वर्ष तीन किलोमिटरमा कालोपत्रेसमेत गरेको थियो । त्यसबाहेक अब करिब १२ किमि सडक कालोपत्रे गर्न बाँकी छ । अहिलेसम्म ७० प्रतिशत काम सकिएको आयोजनाप्रमुख प्रजापतिले बताए । उनका अनुसार अहिलेसम्म पटकपटक गरी निर्माण कम्पनीले १७ करोड ३१ लाख रुपैयाँ भुक्तानी लिएको छ ।
पर्यटक हिँड्ने सडक हो, धुलो उड्न नदिनूः मन्त्री भौतिक पूर्वाधार तथा यातायातमन्त्री वसन्तकुमार नेम्वाङले थपिएको म्यादभित्र अनिवार्य काम सक्न निर्माण कम्पनीलाई निर्देशन दिएका छन् । मन्त्रालयका सचिव, सडकका कर्मचारी र भक्तपुरका जनप्रतिनिधिसहित सोमबार बिहान नगरकोट पुगेका नेम्वाङले व्यवसायीलाई प्रश्न गरे, ‘उपत्यकामा धेरै सडक निर्माणमा स्थानीयवासीको अवरोध छ, तर यहाँ त्यस्तो समस्या पाइएन, फेरि निर्माणको काममा किन ढिलासुस्ती ?’ नेम्वाङले भ्रमण वर्षलाई सफल बनाउनसमेत तुरुन्तै सडक कालोपत्रे हुनुपर्नेमा जोड दिए । नयाँ पत्रिका दैनिकबाट
