काठमाडौँ। आईसीसी टी–२० विश्वकप क्रिकेटको ‘सुपर–८ ‘ मा हिजो भएको खेलमा इंग्ल्यान्डले न्युजिल्यान्डलाई ४ विकेटले हराएको छ।
श्रीलंकाको कोलम्बोमा टस जितेर पहिला ब्याटिङ गरेको न्युजिल्यान्डले ७ विकेट गुमाएर एक सय ५९ रन बनाएको थियो ।
३ ओभरमा ४३ रन आवश्यक रहेको अवस्थाबाट विल ज्याक्स र रेहान अहमदले १६ बलमा अविजित ४४ रनको साझेदारी गरे ।
१८औं ओभरमा ग्लेन फिलिप्सले २२ रन बेहोरे भने १९औं ओभरमा कप्तान मिचेल सान्टनरले १६ रन बेहोरेपछि अन्तिम ओभरमा ५ रन आवश्यक थियो । ज्याक्सले १८ बलमा अविजित ३२ रन बनाए भने रेहानले ७ बलमा १९ रन बनाए ।
इंग्ल्यान्डले सुरुवाती २ ओभरभित्रै २ विकेट गुमाएको थियो । टम बेन्टनले ३३ रन बनाए भने कप्तान ह्यारी ब्रूकले २६ अनि ज्याकब बेथेलले २१ रन बनाए ।
न्युजिल्यान्डका लागि रचिन रविन्द्रले ३ विकेट लिँदा म्याट हेनरी, लकी फर्गुसन र ग्लेन फिलिप्सले १-१ विकेट लिए ।
न्युजिल्यान्डका लागि ग्लेन फिलिप्सले सर्वाधिक ३९ रन जोडे । ओपनर टिम शिफर्टले ३५ रन जोडे ।
इंग्ल्यान्डका लागि रेहान अहमद, आदिल राशिद र विल ज्याक्सले दुई-दुई विकेट लिए ।
न्युजिल्यान्डले यो खेल जितेको भए सेमिफाइनलमा पुग्ने थियो । तर अब टोली पाकिस्तान र श्रीलंकाबीच आज हुने समूह–२ को सुपर–एट खेलको नतिजा पर्खनुपर्नेछ । तालिकामा न्युजिल्यान्डको ३ र पाकिस्तानको १ अंक छ भने श्रीलंका पहिलो दुवै खेलमा पराजित भइसकेको छ ।
