काठमाडौँ: पूर्व प्रहरी महानिरीक्षक चन्द्रकुबेर खापुङले आमनिर्वाचनको संघारमा बिबिसीले सार्वजनिक गरेको विवादास्पद डकुमेन्ट्री गम्भीर चालबाजी रहेको बताएका छन् ।
जनआस्थालाई प्रतिक्रिया दिँदै खापुङले भदौ २३ गतेको जेन जी प्रदर्शन र भोलिपल्टको विध्वंशमध्ये २३ गते दिउँसोको निश्चित समय र स्थानको मात्रै फोटो, भिडियो जोडेर बनाइएको डकुमेन्ट्री ‘प्रायोजित’ रहेको ठहर गरेका छन् ।
खापुङ गत भदौमा जेन जी आन्दोलन हुँदा नेपाल प्रहरीको महानिरीक्षक (आईजी) थिए । बिबिसीले खापुङकै आदेशमा प्रहरीले गोली चलाएको बताएपछि अहिले सर्बत्र आलोचना भइरहेको छ । खासगरी कर्फ्यु लागिसकेपछि आईजीको आदेश के हुन्छ भन्नेमा बहस केन्द्रित छन् ।
अवकाशपछि उनी आजभोलि गृहजिल्ला तेह्रथुममा खेती किसानीमा रमाइरहेको भन्दै सामाजिक संजालमा पोस्ट गरिरहेका पाइन्छन् ।
उनले भनेका छन्, ‘जिल्ला तहबाट कर्फ्यु घोषणा भइसकेको बेला माथिल्लो सुरक्षा नेतृत्वले गोली चलाउन छुट्टै आदेश दिन नपर्ने, परिस्थितिको आवश्यकताअनुसार के गर्ने भन्ने निर्णय जिल्ला सुरक्षा समितिले आफ्नो सर्वमान्य सिद्धान्तबमोजिम कार्यान्वयन हुन्छ ।’
चुुनावको मुखमा जनमतलाई प्रभावित पार्ने उद्देश्यसहित भित्री कन्टेन्ट केही नभएको विषय काटकुट पारेर सामाजिक सञ्जालमार्फत उछालिएको उनको दावी छ ।
डकुमेन्ट्रीका नाममा पश्चिमाहरु आफैँ नेपालको आन्तरिक मामिलामा हात हाल्न हाम्फालेको कुबेरले बताए । ‘यहाँको मिडियाबाजीले नभ्याएर मिशन पुरा गर्न उनीहरु आफैँ हाम्फालेका हुन्’ उनको भनाइ उद्धृत गर्दै जनआस्थाले लेखेको छ ।
दुई महिना मात्रै प्रहरी प्रमुख रहेका खापुङले निर्वाचनको मुखमा गरिएको यस्तो प्रचारबाजीलाई अरुको बदनाम गर्ने बेकारको प्रयास भनेका छन् ।
