डडेल्धुरा। डडेल्धुराको गन्यापधुरा गाउँपालिका–३ गौलीगाउँ देवलका गगनसिं खड्काले ७० वर्षको उमेरमा नागरिकता प्राप्त गर्नुभएको छ ।
सहायक प्रमुख जिल्ला अधिकारी अमरबहादुर वलीले आज उहाँलाई जिल्ला प्रशासन कार्यालय डडेल्धुरामा नागरिकता प्रदान गर्नुभयो ।
विसं २०१२ माघ १५ गते जन्मिनुभएका खड्का १६ वर्षको उमेरमा रोजगारीको खोजीमा भारत जानुभएको थिए । त्यसपछि उहाँ ५५ वर्षपछि फर्किनुभएको हो ।
गाउँ फर्केपछि स्थानीयवासीले बुढेसकालमा सरकारले दिने सामाजिक सुरक्षा भत्ताबारे जानकारी गराएपछि उहाँ नागरिकता बनाउन प्रशासन कार्यालय जानुभएको हो ।
यसैगरी स्थायी ठेगाना सोलुखुम्बु भएका एनबी तामाङले पनि आज ७४ वर्षको उमेरमा नागरिकताको प्रमाणपत्र पाउनुभएको छ । उहाँ करिब पाँच दशकदेखि डडेल्धुरामा बसोबास गर्दै आउनु भएको छ ।
विसं २०३५ देखि डडेल्धुरा आउनुभएका तामाङले विभिन्न कारणले हालसम्म नागरिकता बनाउन नसकेको सहायक प्रमुख जिल्ला अधिकारी ओलीले जानकारी दिनुभयो । रासस
