काठमाडौँ । नेकपा एमालेका सचिव डा. राजन भट्टराईले नितिगत रूपमा एमाले अझैपनि संसद पुनःस्थापनाको पक्षमा रहेको बताउनुभएको छ ।
प्रेस चौतारी नेपालले आयोजना गरेको संवाद कार्यक्रममा उहाँले एमाले संसद पुनःस्थापनाको पक्षमा रहेको बताउनुभएको हो ।
संसद पुनःस्थापना भएमा मुलुकले कम जोखिममा संविधान र लोकतन्त्रलाई सहज मार्गमा फर्काउन सक्ने बताउनु भयो । भट्टराईले एमाले संसद पुनःस्थापनाको पक्षमा भएपनि निर्वाचनबाट नभाग्ने पनि बताउनु भयो । जनतासामु गएर आफ्ना नीति, कार्यक्रम तथा विगतका योगदानका आधारमा पार्टीलाई जनताबाट अनुमोदन गराउन एमाले तयार रहेको उहाँको भनाई छ । उहाँले आगामी निर्वाचनलाई विवेकपूर्ण र संयमित ढंगले लिनुपर्नेमा जोड दिनुभयो । उहाँले आगामी निर्वाचनबाट पनि दीर्घकालीन रूपमा देशलाई स्वतन्त्र र सन्तुलित ढंगले अगाडि लैजानसक्ने नेतृत्व स्थापित हुनुपर्ने बताउनुभयो । गलत निर्णयले भविष्यमा सच्याउनै नसकिने अवस्था सिर्जना हुनसक्ने उहाँको भनाई छ ।
उहाँले भन्नुभयो, ‘हामी नीतिगत रुपमा अहिले पनि संसद पुनःस्थापना हुन्छ भने यो मुलुकले सबैभन्दा कम जोखिमबाट प्राप्त गरेको संविधान र हामीले प्राप्त गरेको लोकतन्त्र सहज बाटोमा फर्किन सक्छ भन्ने मान्याता राख्छौँ । नितिगत रुपमा यो मान्यता अहिले पनि नेकपा एमालेको मान्यताको रुपमा रहेको छ । जहाँसम्म मुलुक निर्वाचनको कोर्समा गएको कुरा छ, हामी जनताको बीचमा गएर जनतासंग संवाद गरेर उनीहरुलाई आफ्ना विचार, नीति, कार्यक्रम, हिजो गरेका काम, योगदान, सेवाहरु उहाँहरुको बीचमा राखेर अनुमोदित हुने कुरामा भाग्दैनौ । एमाले भाग्दैन, भागेको छैन । यो निर्वाचनमा हामीले अत्यन्त विवेकपूर्ण हिसावले संयमतापूर्वक भोलि यो मुलुकलाई स्वतन्त्रतापूर्वक दीर्घकालिन रुपले अगाडी लैजान सक्ने, सन्तुलनकारी भुमिका निर्वाह गर्ने सक्ने र विगतको अनुभव, हिजो आफ्नो राष्ट्रहितको लागि लिएका अडानहरुमाथी उभिएर अगाडी जान सक्ने पंक्ति नै स्थापित हुनुपर्छ । दायाँवाया भयो भने एक पटकको गल्ती भनेर सच्याउन सकिँदैन । कतिपय गल्तीहरु यस्तो हुन्छ, जुन भोली सच्याउन पनि मिल्दैन । युक्रेनले गल्ती सुधार गर्छु भनेर अहिले सुधार गर्नसकेको छैन, त्यो परिस्थिति त्यहाँ बनेको छैन । त्यसैले गल्ती गर्न हुँदैन, हामीले पनि त्यही कुरा पाइरहेका छौँ । हामी काठमाडौ उपत्यकाका भित्रका १५ मध्ये अत्याधिक सिट एमालेको पक्षमा मतदान हुनेछ र हाम्रा उम्मेद्वार विजयी हुनेछन् ।’
उहाँले आगामी निर्वाचनमा एमालेले काठमाडौं उपत्यकामा उल्लेखनीय सफलता हासिल गर्ने दाबी समेत गर्नुभयो । उहाँकाअनुसार उपत्यकाभित्रका १५ निर्वाचन क्षेत्रमध्ये अधिकांश सिटमा एमालेका उम्मेदवार विजयी हुने विश्वास पार्टीले लिएको छ ।
