काठमाडौँ । नेपाली कांग्रेसबाट संस्थापन पक्षले निष्कासन गरेका महामन्त्री गगनकुमार थापाले सभापति शेरबहादुर देउवा नेतृत्वको कार्य समिति भंग भइसकेको र विशेष महाधिवेशन चलिरहेको जानकारी निर्वाचन आयोगलाई पहिले नै गराइसकेको बताएका छन्।
भृकुटीमण्डपमा बन्दसत्रको क्रममा सम्बोधन गर्दै थापाले देउवा पक्षले आयोगमा पठाएको पत्र र प्रतिनिधिको औचित्य नरहेको दाबी गरे।
थापाले भने, “मलाई निर्वाचन आयोग लगायत सबै संस्थाप्रति विश्वास छ। बहुमत महाधिवेशन प्रतिनिधिहरू जम्मा भएर विधिसम्म ढंगले आएको परिणामलाई आयोगले मान्यता दिनेछ। मलाई कानून र संविधानप्रति विश्वास छ। नेपाली कांग्रेस कसैको निजी कम्पनी होइन, कसैले कसैलाई निकाल्न सक्दैन।”
उनले देउवा पक्षले सहमहामन्त्री बद्री पाण्डेलाई निर्वाचन आयोगमा धर्ना राखेर विशेष महाधिवेशन रोक्ने प्रयास गरेको आरोप पनि लगाए।
थापाले थपे, “हामीले विशेष महाधिवेशन उद्घाटनसँगै १४ औं महाधिवेशनबाट निर्वाचित कार्य समिति भंग भएको र नयाँ कार्यसमिति महाधिवेशनबाट निर्वाचित भएपछि अद्यावधिक गरिने विषयमा आयोगलाई पहिले नै पत्र पठाइसकेका थियौं। यस्तो अवस्थामा आयोगमा पठाइएको पत्रले हामीलाई अल्मल्याउने खेल मात्र भएको हो।”
