ग्रिक। ग्रीकका तटरक्षकहरुले शनिबार क्रेटबाट थप १३१ जना आप्रवासीहरूलाई उद्धार गरेको जनाइएको छ ।
यो सँगै यस क्षेत्रमा विगत पाँच दिनमा समुद्रबाट बाहिर निकालिएका मानिसहरूको सङ्ख्या ८४० पुगेको प्रहरी प्रवक्तालाई उदृत गर्दै एएफपीले जनाएको छ ।
प्रहरीका अनुसार शनिबार उद्धार गरिएका आप्रवासीहरू क्रेटको दक्षिणमा रहेको सानो टापु ग्याभडोसबाट करिब १४ माइल दक्षिणमा माछा मार्ने डुङ्गामा सवार थिए ।
यात्रुहरूको राष्ट्रियता खुलासा गरिएको थिएन भने उद्धार पछि सबैलाई गावडोस लगिएको जनाइएको छ । लिबियाबाट क्रेट पुग्ने प्रयास गरिरहेका धेरै मानिसहरू जोखिमपूर्ण यात्रा गर्दा डुबानमा पर्ने गरेको जनाइएको छ ।
डिसेम्बरको सुरुमा, क्रेटको तटमा उनीहरूको डुङ्गा डुबेपछि अधिकाशं सुडानी वा इजिप्टेली सहित १७ जना–मृत फेला परेका थिए भने अन्य १५ जना बेपत्ता भएको रिपोर्ट गरिएको थियो । जसमा दुई जना मात्रै बाँच्न सफल एको जनाइएको छ ।
संयुक्त राष्ट्रसंघीय शरणार्थीका लागि उच्चायुक्तका अनुसार यस वर्षको सुरु देखि युरोप जान खोज्ने १६ हजार ७७० भन्दा बढी व्यक्तिहरू क्रेटमा आएका छन्, जुन अन्य ग्रिसेली टापुको तुलनामा बढी हो ।
गत जुलाईमा, सरकारले आप्रवासीहरूको बढ्दो प्रवाहलाई ध्यानमा राख्दै अत्यावश्यक“ भन्दै लिबियाबाट आएका मानिसहरूको शरण आवेदनहरूको प्रशोधन तीन महिनाका लागि निलम्बन गरेको थियो । रासस
