विराटनगर। मधेस प्रदेशका प्रमुख डा सुरेन्द्र लाभले मैथिली समाज र सभ्यताले सहअस्तित्वमा विश्वास गर्ने बताउनुभएको छ ।
मैथिली एशोसिएसन नेपालद्वारा आज विराटनगरमा आयोजित दुई दिने ‘अन्तरराष्ट्रिय मैथिली सम्मेलन–२०२५’को उद्घाटन गर्दै उहाँले सबैको सहअस्थितित्वको भावना राख्ने भएकैले मैथिली सभ्यता बलियो रहेको बताउनुभयो ।
समाजको विकाससँगै भाषा, साहित्य र संस्कृतिको पनि विकास हुने चर्चा गर्दै प्रदेश प्रमुख डा लाभले समाजमा समृद्धि ल्याउन सभ्यता र संस्कृतिको विकासमा जोड दिनुपर्ने धारणा राख्नुभयो ।
उहाँले मुलुकमा राजनीतिक स्थिरता कायम गराउन मैथिली समाजले पनि भूमिका निर्वाह गर्नुपर्ने भन्दै स्वदेशमा रोजगारी सिर्जना भएमा युवा विदेश पलायन हुने समस्या अन्त्य हुने बताउनुभयो ।
कोशी प्रदेशका पर्यटन, वन तथा वातावरणमन्त्री सदानन्द मण्डलले प्राकृतिक रूपमा धनि देश नेपालमा पर्यटक भित्र्याउन गरी काम गर्नुपर्नेमा जोड दिनुभयो । उहाँले देशमा रहेका महत्त्वपूर्ण धार्मिकस्थलको प्रचार र विकास गर्दै भारतीय पर्यटकलाई नेपाल भ्रमणका लागि आह्वान गर्नुपर्ने बताउनुभयो ।
राष्ट्रिय समाचार समिति (रासस) का कार्यकारी अध्यक्ष धर्मेन्द्र झाले समयको आवश्यकतालाई महसुस गरी आउने निर्वाचनमा मैथिली भाषालाई पनि एक मुद्दाको रूपमा अघि सार्नुपर्ने विचार व्यक्त गर्नुभयो । उहाँले मैथिली भाषा, संस्कृति र सम्भताको संरक्षणमा जोड दिँदै पछिल्लो समय मैथिली भाषीको सङ्ख्या कम हुँदै गइरहेकाले यसमा पनि सोधखोज हुनुपर्नेमा जोड दिनुभयो ।
संविधानसभा सदस्य एवं युवा नेता जीतेन्द्र देवले मिथिला पहिचान, संस्कृति, इतिहास र सभ्यतालाई मर्न नदिन सबै लाग्नुपर्ने बताउनुभयो । मैथिली सेवा समितिका अध्यक्ष डा एसएन झाको अध्यक्षतामा भएको कार्यक्रममा मैथिली एसोसिएसन नेपालका उपाध्यक्षद्वय पङ्कज बर्मा र आवा अनुपमा, मैथिली साहित्यकार रामभरोस कापरी, युवा नेता उमेश यादवलगायतले आफ्नो धारणा राख्नुभएको थियो ।
