चितवन। जिल्लामा पहिलोपटक ज्येष्ठ नागरिकका लागि ‘डेकेयर’ तथा आवास केन्द्र सञ्चालनमा आएको छ।
आरोग्य केयर होम भरतपुरले भरतपुर महानगरपालिका–११ नौरङ्गेमा उक्त केन्द्र स्थापना गरी सेवा सुरु गरेको हो । प्रारम्भिक चरणमा १५ जना ज्येष्ठ नागरिकलाई आवासीय सेवा प्रदान गर्नेगरी केन्द्र सञ्चालनमा आएको हो ।
यहाँ फिजियोथेरापीसहित विभिन्न स्वास्थ्य सेवा, मनोरञ्जनात्मक कार्यक्रम, सामाजिक क्रियाकलापलगायत गतिविधि सञ्चालन गरिने केन्द्रका अध्यक्ष हीरामान महर्जनले जानकारी दिनुभयो ।
उहाँले भन्नुभयो, “केन्द्र स्थापना गर्नुको मुख्य उद्देश्य ज्येष्ठ नागरिकको स्वास्थ्य, मनोरञ्जन र सामाजिक सहभागितालाई प्रोत्साहन गर्नु हो ।” योसँगै ज्येष्ठ नागरिकलाई परिवारबाहिर पनि सामाजिक तथा मानसिक रूपमा सक्रिय रहन सहयोग पुग्ने अपेक्षा गरिएको उहाँले बताउनुभयो ।
केन्द्रमा फिजियोथेरापी सेवा, शल्यक्रियापछिको हेरचाह, डिमेन्सिया (६० वर्षभन्दा माथिका लाग्ने एक प्रकारको बिर्सने रोग), अल्जाइमर, पार्किन्सन रोगीको हेरचाह, पक्षघात (प्यारालाइसिस) भएका बिरामीको हेरचाह, ‘पेलियटिभ केयर’ (क्यान्सरको अन्तिम चरणको उपचारमा रहेकालाई सान्त्वनासहितको सेवा) लगायत सेवा उपलब्ध गराइने अध्यक्ष महर्जनले जानकारी दिनुभयो ।
हाल दैनिक रूपमा नियमित सेवा दिँदै आएको केन्द्रले भविष्यमा आवश्यकताअनुसार सेवा विस्तार गर्ने योजनासमेत बनाएको केन्द्रका सूचना अधिकारी फडिन्द्र न्यौपानेले बताउनुभयो । उहाँका अनुसार केन्द्र ४५ जना शेयर सदस्यको लगानीमा स्थापना गरिएको हो । करिब रु दुई करोडको लगानीमा पाँच कठ्ठा क्षेत्रफलमा निर्माण गरिएको केन्द्रले प्रारम्भिक चरणमा १५ शय्याबाट सेवा सुरु गरेको छ ।
केन्द्रमा हाल १५ जना कर्मचारी कार्यरत छन्, जसमध्ये सात जना केयर गिभर (हेरचाहकर्ता) रहेका सूचना अधिकारी न्यौपानेले जानकारी दिनुभयो । उहाँका अनुसार आवासीय संरचनाअन्तर्गत १० वटा सामान्य शय्या र पाँच वटा मेडिकल क्याबिनको व्यवस्था गरिएको छ ।
सम्पूर्ण भवन अपाङ्गमैत्री संरचनाअनुसार निर्माण गरिएको न्यौपानेले जानकारी दिनुभयो । ज्येष्ठ नागरिकको स्वास्थ्य सेवाका लागि विशेषज्ञ चिकित्सकबाट अन–कल ( घरमै स्वास्थ्य सेवा) समेत उपलब्ध गराइने केन्द्रले जनाएको छ ।
