सुनसरी। पाँचौँ राष्ट्रिय ज्येष्ठ नागरिक दिवसका अवसरमा इटहरीमा ७६ जना ज्येष्ठ नागरिक सम्मानित भएका छन् ।
ज्येष्ठ नागरिक समन्वय समिति इटहरीको आयोजना तथा इटहरी उपमहानगरपालिकाको सहयोगमा सम्पन्न कार्यक्रममा इटहरी उपमहानगरपालिकाअन्तर्गतका २० वटै वडाबाट छनोट गरिएका ज्येष्ठ नागरिकलाई दोसल्ला ओढाएर सम्मान गरिएको ज्येष्ठ नागरिक समन्वय समितिका उपाध्यक्ष तुलाराम दङ्गालले जानकारी दिनुभयो ।
समाज विकासमा ज्येष्ठ नागरिकहरूको योगदान अतुलनीय रहेको उल्लेख गर्दै उहाँहरूको सम्मानले आगामी पुस्तालाई प्रेरणा मिल्ने भएका कारण प्रत्येक वडा क्षेत्रबाट प्रतिनिधित्व हुनेगरी ज्येष्ठ नागरिकलाई समेटेर सम्मान गरिएको उहाँले बताउनुभयो ।
सरकारले ज्येष्ठ नागरिकलाई सामाजिक सुरक्षा कार्यक्रमसँग जोड्दै हरेक वर्ष मनाउँदै आएको राष्ट्रिय ज्येष्ठ नागरिक दिवस पछिल्ला पाँच वर्षदेखि नियमित रूपमा मनाइँदै आएको छ । रासस
