काठमाडौं । नेपालले छिमेकी चीनको तिब्बत स्वशासित जनसरकारलाई पनि स्वास्थ्य सामग्री अनुदानमा उपलब्ध गराइदिन आग्रह गरेको छ । तिब्बतमा कोरोना भाइरस रोकथाम तथा नियन्त्रणका लागि केन्द्र सरकार बेइजिङले पठाएका स्वास्थ्य सामग्रीबाट आफ्नो देशलाई सहयोग गर्न नेपाल सरकारले औपचारिक आग्रह गरेको हो ।

ल्हासास्थित नेपाली महावाणिज्यदूत गोविन्दबहादुर कार्कीले तिब्बत सरकारसँग छलफल भइरहेको जानकारी दिए । उनले भने, ‘हामीले सहयोगका लागि अनुरोध गरेका छौँ । उहाँहरूले सकारात्मक जवाफ दिनुभएको छ । तर, समयसीमा तोकिएको छैन । हामी आशावादी छौँ,’ उनले भने । नेपालको तातोपानी नाकाबाट करिब नौ सय किलोमिटरको दूरीमा ल्हासा छ ।

ल्हासाबाट एकैदिनमा स्वास्थ्य सामग्री गाडीमा हालेर नेपालको सीमा ल्याउन सकिने महावाणिज्यदूत कार्कीले बताए । तिब्बत सरकारले केन्द्र सरकारसँग समन्वय गरेर आवश्यक निर्णय लिइने र नेपाललाई सक्दो सहयोग गर्ने आश्वासन दिएको छ ।

तिब्बतमा अहिलेसम्म एकजना व्यक्ति मात्रै कोरोना भाइरसबाट संक्रमित भएका छन् । उनको हाल उपचार भइसकेको छ । नेपालले चीनको केन्द्र सरकारलाई स्वास्थ्य सामग्री, टेस्ट किट्स, भेन्टिलेटर, एम्बुलेन्ससहितका सामान अनुदानमा उपलब्ध गराइदिन आग्रह गरिसकेको छ । चीन सरकारले एक साताभित्र सामान जम्मा हुने र त्यसपछि नेपाल पठाइदिने आश्वासन दिएको छ । नेपालले छिमेकी चीनको स्वशासित तिब्बत सरकारसँग बेग्लै आग्रह गरेको हो ।

ग्वान्जाओबाट स्वास्थ्य सामग्री ल्याउने तयारी

चीनको व्यापारिक सहर ग्वान्जाओबाट नेपालका लागि आवश्यक स्वास्थ्य सामग्री ल्याउने तयारी भएको छ । नेपाली औषधि व्यवसायी तथा गैरआवासीय नेपाली संघ ९एनआरएनए०ले दिने भनेको एक करोड रुपैयाँबराबरको स्वास्थ्य उपकरण ग्वान्जाओबाट ल्याउने तयारी भएको छ ।

सरकारले निजी क्षेत्रलाई आग्रह गरेअनुसार सामान खरिद गरेर ग्वान्जाओबाटै ल्याउने तयारी भएको छ । ग्वान्जाओस्थित नेपाली उपमहावाणिज्यदूत कुञ्जन शाहले नेपाल सरकारलाई उत्पादक कम्पनीको नाम र विवरण पठाएको जानकारी दिए । शाहले टेलिफोनमा नयाँ पत्रिकासँग भने, ‘सामान ल्याउने विषयमा छलफल भइरहेको सुनेका छौँ, हामीलाई अहिलेसम्म समन्वय गर्नू भन्ने निर्देशन नेपाल सरकारले दिएको छैन ।’ नेपाल एयरलाइन्सको जहाज शनिबार ग्वान्जाओका लागि जाँदै छ ।

दुई हजार किट्स आज आउँदै

चीनको बेइजिङ साभन्त बायो टेक्नोलोजीले नेपाललाई दिएका दुई हजार थान कोरोना भाइरस जाँच्ने उपकरण ९किट्स० शुक्रबार मात्र तिब्बतको ल्हासा आइपुगेको छ । बिहीबारै ल्हासा आउने भनिए पनि सामान सिचुआनको छेन्दु मात्रै आइपुगेको थियो । शुक्रबार उडानमार्फत ल्हासा आएपछि सामान गाडीमा हालेर नेपाली महावाणिज्य दूतावासले तातोपानी नाकातर्फ पठाउनेछ । ‘सामान तातोपानीतर्फ पठाउने प्रक्रिया पूरा गराउँदै छौँ,’ ल्हासास्थित नेपाली महावाणिज्यदूत कार्कीले टेलिफोनमा नयाँ पत्रिकासँग भने ।

बुधबार चिनियाँ कम्पनीले कोरोना भाइरस एन्टिजिन डिटेक्सन रिएजेन्ट टेस्टिङ किट्स बेइजिङस्थित नेपाली दूतावासलाई हस्तान्तरणको प्रक्रिया पूरा गरेको थियो । ती सामान आइतबार काठमाडौं ल्याउने तयारी छ । सरकारले तातोपानी भन्सार कार्यालयलाई सामान ल्याउन निर्देशन दिइसकेको छ ।

किट्स उत्पादक कम्पनीका महाप्रबन्धक वाङ गुओपिङले बुधबार उक्त सामग्री बेइजिङस्थित नेपाली दूतावासमा कार्यवाहक नेपाली राजदूत सुशीलकुमार लम्साललाई हस्तान्तरण गरेका थिए । यी सामान तीस हजार अमेरिकी डलर (करिब ३६ लाख नेपाली रुपैयाँ)बराबरका हुन् । बेइजिङस्थित दूतावासले आफ्नो सम्पर्कमा रहेका कम्पनीलाई नेपालीका लागि अनुदानमा सामान उपलब्ध गराउन आग्रह गरेको छ । केही कम्पनी र दाताले पनि सामान दिने इच्छा देखाएका छन् ।, समाचार नयाँ पत्रिका दैनिकमा प्रकाशित छ ।