काठमाडौं । काठमाडौं महानगरका मेयर बालेन साह, ‘हामी नेपाल’ का संस्थापक सुदन गुरुङ, कलाकार, युट्युवर र कन्टेन्ट क्रियटरहरूविरुद्ध भदौ २४ गतेको घटनालाई लिएर जिल्ला प्रहरी परिसर काठमाडौंमा किटानी जाहेरी परेको छ ।
अनुप उप्रेती र राजन चेम्जोङले संयुक्त रूपमा दिएको जाहेरीमा राज्यविरुद्धको कसुर, आतंकवादसम्बन्धी कसुर, सार्वजनिक शान्तिविरुद्धको कसुर, हातहतियार खरखजाना र विस्फोटक पदार्थसम्बन्धी कसुर लगायतका आरोप लगाइएको छ ।
जाहेरीमा भनिएको छ कि हालैको ‘जेन–जी आन्दोलन’ का क्रममा सामाजिक सञ्जालको दुरुपयोग गरी हिंसा भड्काउने, सार्वजनिक सम्पत्तिमा क्षति पुर्याउने तथा दंगा उक्साउने गतिविधि गरिएको थियो ।
उप्रेती र चेम्जोङले मेयर साह र गुरुङसँगै कलाकार संजोग कोइराला, निश्चल बस्नेत, हिमेश पन्त, पत्रकार राजीव खत्री, नेतृ ज्वाला संग्रौला, युट्युवर भाग्य न्यौपाने, प्रदीप ज्ञवाली, टिकटकर मनोज के।सी।, पूर्वसांसद सुमना श्रेष्ठ, सामाजिक अभियन्ता केपी खनाल, रिमा विश्वकर्मा, मिराज ढुङ्गाना, रक्षा बम, प्रवेश दाहाल, योग्यता भण्डारी, दीपकजंग अधिकारी, ओजस्वी थापा, भोजराज थापा, पुरुषोत्तम यादव, जेम्स कार्की, युजन राजभण्डारी र रामकुमार खड्का लगायतलाई समेत प्रतिवादीका रूपमा समावेश गरेका छन् ।
जाहेरीवालाले प्रहरीलाई बुझाएको कागजमा फोटो र भिडियोहरू प्रमाणका रूपमा प्रस्तुत गरिएको छ, जसमा आरोपितहरूले विभिन्न स्थानमा आगो लगाउन, तोडफोड गर्न र भीड उक्साउन निर्देशन दिएको दाबी गरिएको छ ।
यस घटनाबारे प्रहरी परिसर काठमाडौंका एक अधिकारीले भने, “जाहेरी दर्ता भएको छ । प्रारम्भिक अध्ययनपछि आवश्यक अनुसन्धान प्रक्रिया अघि बढाइनेछ ।”
