काठमाडौँ। कान्तिपुर हाफ म्याराथन, तेह्रौ संस्करण प्रतियोगिता यही जेठ १७ गते हुने भएको छ ।
कान्तिपुर पब्लिकेसन्स लिमिटेडको आयोजनामा हुने उक्त प्रतियोगितामा हाफ म्याराथन २१ दशमलव एक किलोमिटर, कर्पोरेट रन पाँच किमी, कलेज रन सात किमी तथा ह्विलचेयर रेस हुने आज यहाँ आयोजित पत्रकार सम्मेलनमा जानकारी दिइयो ।
उक्त प्रतियोगिताअन्तर्गत हाफ म्याराथनतर्फका विजेताले जनही रु एक लाख ५० हजार, दोस्रो हुनेले रु ६५ हजार, तेस्रोले रु ५० हजार, चौथोले रु ३० हजार, पाँचौँले रु २० हजार तथा छैटौँ स्थान हासिल गर्नेले रु १० हजार प्राप्त गर्नेछन् ।
प्रतियोगितामा कान्तिपुरको कार्यालय रहेको थापाथलीस्थित सेन्ट्रल विजनेस पार्कबाट सुरु हुने हाफ म्याराथन थापाथली, माइतीघर मण्डला, बानेश्वर, तीनकुने, कोटेश्वर, जडिबुटी, लोकन्थली गठ्ठाघर, ठिमी, सल्लाघारी चोकबाट सोही रुट हुँदै पुनःसेन्ट्रल बिजनेस पार्कमै आएर सकिनेछ ।
ह्विलचेयर रेसतर्फको शीर्ष तीन स्थान हासिल गर्ने खेलाडीले क्रमशः रु ३५ हजार, रु २५ हजार र रु १५ हजार नगद पुरस्कार पाउनेछन् । कर्पोरेट रन र कलेज रनको महिला र पुरुषतर्फ शीर्ष तीनमा रहने खेलाडीले विभिन्न पुरस्कार र गिफ्ट हृयाम्पर पाउनेछन् ।
कर्पोरेट दौड सेन्ट्रल बिजेनस पार्कबाट सुरु भई थापाथली, माइतीघर मण्डला, वानेश्वर, सिभिल हस्पिटल अगाडिबाट फर्किएर पुनःबानेश्वर मन्डला, माइतीघर, थापाथली हुँदै सेन्ट्रल बिजनेस पार्कमा गएर टुङ्गिने छ ।
सेन्ट्रल बिजेनस पार्कबाटै सुरु हुने ह्विलचेयर रेस थापाथली, माइतीघर मण्डला हँुदै पुनःसेन्ट्रल विजनेस पार्कमै आएर समाप्त हुनेछ । रासस
