काठमाडौं। आईसीसी विश्वकप लिग–२ को स्कटल्याण्ड सिरिजअगाडिको तयारीमा जुटेको नेपाली राष्ट्रिय क्रिकेट टोलीले लगातार तेस्रो जित निकालेको छ।
बिहीबार सम्पन्न अभ्यास खेलमा नेपालले इंग्ल्यान्डको ग्लोसेस्टरशायर टिमलाई ७३ रनले पराजित गर्दै सानदार जित दर्ता गर्यो। पहिले ब्याटिङ गर्दै नेपालले निर्धारित २० ओभरमा ६ विकेटको क्षतिमा १९५ रन बनाएको थियो। कुशल भुर्तेलले सर्वाधिक ४६ रन बनाए भने कप्तान रोहितकुमार पौडेलले ३५, दीपेन्द्रसिंह ऐरीले ३२, अनिलकुमार साहले २९ र आरिफ शेखले अविजित २२ रन बनाए।
बलिङमा ग्लोसेस्टरशायरका डेभिड पेन र अमन राओले समान दुई–दुई विकेट लिए। जवाफमा ब्याटिङ गरेको ग्लोसेस्टरशायर १७.३ ओभरमा मात्र १२१ रनमा अलआउट भयो। नेपाली बलर सन्दीप लामिछाने, नन्दन यादव र बसिर अहमदले दुई–दुई विकेट लिएर टिमलाई जित दिलाए।
अब नेपालले आगामी जुन २ देखि स्कटल्याण्डमा सुरु हुने आईसीसी विश्वकप लिग–२ सिरिजमा भाग लिनेछ।
