काठमाडौँ। भारतको ओडिसास्थित कलिंगा इन्स्टिच्युट अफ इन्डस्ट्रियल टेक्नोलोजी (केआईआईटी)मा अध्ययनरत बीस वर्षीया नेपाली विद्यार्थी प्रकृति लम्सालको शंकास्पद मृत्यु र त्यसपछिका घटनाक्रममा राष्ट्रिय स्वतन्त्र पार्टीको गम्भीर ध्यानाकर्षण भएको छ ।
प्रकृतिको निधन र त्यसपछिका घटनाक्रममा केआईआईटी प्रशासनको गैर–जिम्मेवारी देखिन्छ । प्रकृतिले दुईपटक लिखित उजुरी दिँदासमेत मानसिक याताना दिने व्यक्तिविरुद्ध कारबाही नगर्नु, कलेजको साखमा असर पर्ने भन्दै प्रकृतिको निधन ढाकछोप गर्नु र घटना छानबिनको माग गर्ने नेपाली विद्यार्थीलाई सूचना नै जारी गरेर दमनपूर्वक कलेज/होस्टल छाड्ने उर्दी जारी गर्दै लखेट्नु केआईआईटी प्रशासनको अक्षम्य त्रुटि देखिन्छ ।
साथै, प्रकृतिको शंकास्पद मृत्युपछि त्यहाँ अध्ययनरत करिब एक हजार पाँच सय विद्यार्थीले कलेज/होस्टल छोड्नुपर्ने विषम परिस्थिति बन्दासम्म नेपाल सरकारले त्यसबारे पर्याप्त र भरपर्दो सूचना संकलन गरी समयमै सम्बन्धित निकायसँग समन्वय गर्न नसक्नुबाट सरकारले यस घटनालाई गम्भिरताका साथ नलिएको प्रष्ट हुन्छ । यसबाट विदेशमा अध्ययनरत नेपाली विद्यार्थीहरुको सुरक्षा, चिन्ता र चासोमा सरकारको रबैया कस्तो छ भन्ने उदाङ्गो भएको छ ।
केआईआईटी प्रशासनले घटनाको निष्पक्ष छानबिनमा सहयोग गरी दोषीमाथी कारबाही गर्ने प्रतिबद्धता गर्दै बलपूर्वक कलेज/होस्टल छाड्न बाध्य पारिएका विद्यार्थीलाई फिर्ता हुने वातावरण बनाउन, विभिन्न ठाउँमा अलपत्र परेको र बेखर्ची भएका विद्यार्थीहरुलाई आवश्यक सहयोग समन्वय गर्न साथै उनीहरुलाई भयरहित वातावरणको लागि पहल गर्न नेपाल सरकार र सम्बन्धित निकायको ध्यानाकर्षण गराउँदछौं ।
नेपाली विद्यार्थीले घटनाको निष्पक्ष छानबिन, प्रकृतिको मृत्यु प्रकरणका दोषीलाई कारबाही तथा आफूहरुमाथि ज्यादती गर्ने कलेजका कर्मचारीमाथि कारबाहीको माग गर्दै ८ बुँदे माग राखेको विषयमा गम्भीर हुनुका साथै प्रकृतिको सन्दर्भमा निष्पक्ष छानबिनको प्रत्याभूति र त्यहाँ रहेका नेपाली विद्यार्थीहरूको पूर्ण सुरक्षा, भयरहित वातावरणमा अध्ययन र भविष्यमा यस्ता घटना नदोहोरिने वातावरण निर्माणका लागि तत्काल प्रभावकारी कुटनीतिक पहल गर्न सरकारसँग माग गर्दछौं ।
