काठमाडौं। आम जनता पार्टी (आजपा)का अध्यक्ष एवं पूर्वमन्त्री प्रभु साहले वर्तमान सरकारले पतौरा स्थित धार्मिक, सांस्कृतिक, पर्यटकीय एवं ऐतिहासिक पुरातात्विक महादेव मन्दिरमा आयोजना हुने मधानी महोत्सवमा ध्यान नदिएको गुनासो गरेका छन् ।
प्रतिनिधि सभाको आज (मंगलबार) बसेको बैठकमा बोल्दै आजपा अध्यक्ष साहले रौतहटको मौलापुरको पतौरा स्थित प्रत्येक बर्ष भगवान शिव पार्वतीकोको विवाह उत्सवको रुपमा मनाईने मधानी महायज्ञमा यस अघि सरकारले ध्यान दिएको तर अहिलको सरकार ध्यान नदिएको बताए ।
‘भगवान शिव र पार्वतीको विवाह उत्सवको रुपमा मनाईने मधानी महायज्ञमा नेपाल र भारतका लाखौं दर्शनार्थीहरुको भिड हुने गर्छ । साधुसन्त, कलाकार सहित प्राचिक दंगल कार्यक्रममा लाखौंको सहभागिता हुनेगरेको छ’, साहले भने, ‘विगतका सरकारले त्यहाँ आफ्नो उपस्थिति देखाउँथ्यो । सडक मर्मत गथ्र्यो । खानेपानीको व्यवस्था गथ्र्यो, टेलिकमको उपस्थिति हुन्थ्यो, स्वास्थ्यको रेखदेख हुन्थ्यो । तर यसपालि सरकारको कुनै प्रकारको उपस्थिति देखिएन, सरकारको चासो देखिएन् ।’
नेपाल र भारतको सम्बन्ध जोडने मधानी महोसत्वमा सरकारले चासो नदिएको भन्दै स्थानीयले गुनासो गरिरहेको उनले बताए । नेपाल र भारतका भक्तजनहरुको साझा स्थल रहेको मधानी महायज्ञमा सरकारले किन चासो दिएन भन्ने स्थानीय प्रश्न उठाईरहेको उनले बताए । मधानी महोत्सवमा शान्ति सुरक्षाको प्रवन्ध सहित सरकारले आफ्नो भूमिका देखाओस् भन्दै साहले सरकारको ध्यानाकर्षण गराएका छन् ।
‘पुरातात्वि महादेव मन्दिर नेपालमै पर्छ, सभामुख महोदय । यदी नेपालमै पर्छ भने नेपाल सरकारको पनि दायित्वमा पर्नुपर्ने हो । किनकी पुरातात्विक सम्पदा केन्द्र सरकारकै मातहतमा रहेको छ । अझै त्यहाँको उत्खनन पुरा भएको छैन्, अधुरै उत्खनन छोडेर सरकार भाग्न मिल्दैन’, साहले भने, ‘उत्खननको पोजिसन के छ ? सरकारले सार्वजनिक गर्नुपर्छ । किनकि ति उत्खननका सम्पदाहरु नष्ट भईरहेका छन् ।’
अहिले जतिपनि उत्खनन भईरहेका छन् त्यस मध्ये पतौराको सबैभन्दा पुरानो भएको बताउदै उनले गुप्तकालिन ति सम्पदाको संरक्षण, प्रवद्र्धन गर्ने जिम्मेवारी सरकारको भएको बताए । तर सरकारले हेलचेक्रयाई गरिरहेकोमा उनले दुख व्यक्त गरे ।
रौतहटको मौलापुर नगरपालिका पतौरा स्थित धार्मिक, सांस्कृतिक, पर्यटकीय एवं ऐतिहासिक पुरातात्विक महादेव मन्दिरलाई विश्वसम्पदा सूचिमा सूचिकृत गराउने संकल्प सहित हुन लागेको मधानी महायज्ञ आउँदो ११ फागुनदेखी सुरु हुदैछ ।
मधानी महायज्ञ प्राचिन यज्ञ भएको र यहाँ ब्राह्मण बिना नै मन्त्रको जप हुने गरेको छ । ११ फागुनमा उदघाटन समारोह, १२ फागुनमा शिव वारात यात्रा, १३ गते मधानी विशेष पुजा समारोह, १४ गते मधानी विशेष सांस्कृतिक समारोह र १५ गते मधानी विशेष दंगल कार्यक्रम रहेको छ ।
