काठमाडौँ । नेपाल प्रिमियर लिग (एनपिएल) अन्तर्गत काठमाडौँ गुर्खाज पराजित भएको छ ।
भर्खरै सम्पन्न खेलमा काठमाडौँ जनकपुर बोल्ट्ससँग ५ विकेटले पराजित भएको हो । काठमाडौँले दिएको १०२ रनको लक्ष्य जनकपुरले १५.५ ओभरमा ५ विकेट गुमाएर भेट्टायो । उसका लागि जेम्स निशमले २७, हर्ष ठाकरले अविजित २५, लाहिरु मिलान्थाले १६, मोहम्मद मोहसिनले १३ तथा अनिल शाहले ११ रन जोडे ।
बलिङतर्फ काठमाडौँका करण केसीले दुई, शाहब आलम, जेरहार्ड इरासमस र दिपेश कँडेलले एक–एक विकेट लिए । त्यसअघि टस जितेर पहिले ब्याटिङ गरेको काठमाडौँले १९.३ ओभरमा सबै विकेट गुमाएर १०१ रन बनायो ।
काठमाडौँका लागि जेरहार्ड इरासमसले सर्वाधिक २० रन बनाए । सो क्रममा उनले दुई चौकासमेत प्रहार गरे । कप्तान करण केसीले १९ र स्टिफन एस्किनाजी १७ रन बाहेक अन्य कुनै पनि खेलाडीले दोहोरो अङ्कको रन बनाउन सकेनन् ।
जनकपुरका लागि ललित राजवंशी र शेर मल्लले सर्वाधिक समान तीन–तीन विकेट लिए । यस्तै, मोहम्मद मोहसिनले दुई, अरनिको यादव र किशोर महतोले एक–एक विकेट हात पारे ।
जितसँगै प्लेअफमा पुग्ने जनकपुर पहिलो टोलि बनेको छ । उसले ५ खेलमा जित हात पार्दै एक खेलमा पराजित भएको छ । काठमाडौँको भने प्लेअफ यात्रा कठिन बनेको छ । उसले ५ खेलमा तीनमा हार र दुईमा जित निकालेको छ ।
