काठमाडौँ । लुम्बिनी लायन्सका कप्तान रोहितकुमार पौडेलले यसअघिका खेलमा राम्रो नतिजा नआएकाले आज जित निकाल्नु सुखद् पक्ष रहेको बताएका छन् ।
चितवन राइनोजविरुद्ध जितपछि उनले आगामी यात्रा तय गर्न यो जित पर्याप्त नहुने भएकाले बाँकी खेलमा पनि ध्यान दिने बताएका छन् ।
रोहितले पछिल्ला खेलमा बलिङ राम्रो नसके पनि आजको खेलमा राम्रो साथ पाएको बताएका छन् । यस अघिका खेलमा आफूले बलिङ नगर्नु गल्ती महशुस भएको उनी बताउँछन् ।
उनले चार खेलमा हार व्यहोर्दा सबै खेलाडीको मनोबल उच्च बनाइराख्न सहज नभएको उल्लेख गरे । उनले यो पिचमा आफ्नो लागि अहिलेसम्मकै राम्रो भइहेको पनि बताएका छन् । जारी एनपिएलमा पहिलो जितले पनि टोलीको लक्ष्य पूरा नहुने भएकाले बाँकी खेलमा ध्यान दिनुपर्ने उनी बताउँछन् ।
चितवन राइनोजको प्रशिक्षक उमेश पटवालले रोहित र साद बिन जफरले उत्कृष्ट ब्याटिङ गरेपछि आफ्नो टोलीको लक्ष्य पूरा नभएको बताए । उनले हारको बाबजुद कप्तान कुशल मल्लले राम्रोसँग जिम्मेवारी वहन गरेको उल्लेख गरेका छन् ।
उनले कहिले काहीँ खराब दिन आउने र आज कुशलको लागि राम्रो नभएको बताएका छन् । उनले विदेशी खेलाडीभन्दा अगाडि रोहित उच्च रनकर्ता हुनु नेपाली क्रिकेटका लागि सुखद् पक्ष रहेको बताएका छन् ।
