काठमाडौं । प्रधानमन्त्री केपी शर्मा ओलीको चीन भ्रमणका क्रममा हुने भनिएको बिआरआइ सम्झौता एड लेखेपछि सहमति भएको छ । नेपाल सरकार र चीन सरकार बीचको बेल्ट एवं रोड सहकार्यको फ्रेमवर्कमा आज बिहान बेइजिङमा हस्ताक्षर भएको हो ।
फ्रेमवर्क सम्झौतामा नेपालका तर्फबाट परराष्ट्र मन्त्रालयका सचिव अमृतबहादुर राई र चीनका तर्फबाट चीनका नेशनल डेभलपमेन्ट एण्ड विकास रिफर्म कमिशनका उपाध्यक्ष लिउ सुशेले हस्ताक्षर गर्नुभएको छ ।
यसअघि नेपाल सरकारले चीनको बिआरआइको पूरै कार्यान्वयन सम्झौता नगरी आफ्ना तर्फबाट एक अलग्गै फ्रेमवर्क नै तयार पारेर लगेको थियो ।
तर त्यो फ्रेमवर्कमा चीनले बिआरआइ अन्तर्गत नै दिने सहयोग या परियोजना पनि अनुदानमा नै गर्नुपर्ने प्रस्ताव गरिएको थियो । तर सबै परियोजनाहरुमा अर्थात् सबै फ्रेमर्वकमा अनुदान मात्र लेखिएपछि त्यसमा चीनले समर्थन गर्न नसक्ने जनाएपछि हिजो त्यसमा हस्ताक्षर हुन सकेको थिएन ।
त्यसपछि हिजोदेखि अनुदानको सट्टा अर्काे शब्दको खोजी भएको थियो र नेपालले त्यसमा अनुदान हटाएर एड अर्थात् सहायता भन्ने लेखेपछि हुनेतर्फ उन्मुख भएको थियो ।
सो सम्झौता हिजो नभएर आज भएको हो । हिजो राति अबेरसम्म नै त्यसमा सहमति खोज्ने प्रयास भएको थियो, तर सहमति भएको थिएन । आज भने सहमति भएको र त्यसम हस्ताक्षर गरिएको हो ।
योसँगै चीनले लामो समयदेखि अघि सारेको र नेपालले सात बर्षअघि फ्रेमवर्कमा मात्र हस्ताक्षर गरेको सो परियोजनाको नेपालका पनि कार्यान्वयनको बाटो खुलेको छ ।
हिजो राति अबेरसम्म नै सो परियोजनामा हस्ताक्षर गर्ने भनी संयुक्त बक्तव्यमा जतिसक्दो चाँडै बिआरआइमा दुवै पक्ष हस्ताक्षर गर्न सहमत भएका छन् भन्ने शब्दावली राखिएको थियो ।
