काठमाडौँ । पहिलो एकदिवसीय खेलमा अष्ट्रेलियाले पाकिस्तानलाई २ विकेटले पराजित गरेको छ । योसँगै टोलीले ३ खेलको शृङ्खलामा १–० को अग्रता लिएको छ ।
सोमबार मेलबर्नमा भएको पहिलो खेलमा अष्ट्रेलियाले टस जितेर पहिले बलिङ गर्ने निर्णय गरेको थियो । पाकिस्तानी टोली ४६.४ ओभरमा २०३ रनमा सिमित भयो । जवाफमा कङ्गारु टोलीले ३३.३ ओभरमा ८ विकेट गुमाएर लक्ष्य पूरा गर्यो ।
अष्ट्रेलियाका फास्ट बलर मिचेल स्टार्कले सर्वाधिक ३ विकेट लिए । उनी खेलको प्लेयर अफ द म्याच चुनिए । योसँगै कप्तान प्याट कमिन्सले २ विकेट लिए भने अविजित ३२ रन बनाए ।
दुई टोलीबीचको दोस्रो एकदिवसीय खेल नोभेम्बर ८ मा एडिलेडमा हुनेछ । अष्ट्रेलिया भ्रमणमा पाकिस्तानले तीन खेलको टी–२० सिरिज पनि खेल्नेछ ।
