काठमाडौं । पूर्व राष्ट्रपति विद्यादेवी भण्डारीले असोज ११ गते शुक्रबारदेखि देशका विभिन्न भागमा परेको अविरल वर्षाबाट सिर्जित बाढी, पहिरो र डुबानले जनधनको ठूलो क्षति पुर्याएकोमा गहिरो दु:ख व्यक्त गर्नुभएको छ । उहाँले यस प्राकृतिक विपत्तिमा परी ज्यान गुमाउनेहरूप्रति हार्दिक श्रद्धाञ्जली अर्पण गर्दै शोकसन्तप्त परिवारमा गहिरो समवेदना प्रकट गर्नुभएको छ ।
उहाँले यस मनसुनजन्य विपद्ले ठूलो सङ्ख्यामा मानिसको ज्यान लियो, हजारौँ घाइते बनाउनुका साथै धेरै घरपरिवारलाई थातथलोबाट विस्थापित गराएको र सयौँ मानिसहरूलाई वेपत्ता पारेको स्मरण गर्दे यस्तो सङ्कटको घडीमा मृतकका परिवारलाई राहत उपलब्ध गराउन, घाइतेको उपचार गर्न, वेपत्ताको खोजी गर्न, विस्थापित परिवारको पुनर्स्थापनामा जुट्न नेपाल सरकारलाई हार्दिक आव्हान गर्नुभएको छ ।
पूर्वराष्टपति भण्डारीले जारी गर्नुभएको बिज्ञप्तिमा भनिएको छ – सर्वविदितै छ कि हामी भूकम्प, बाढी, पहिरो, खडेरी जस्ता पति प्राकृतिक विपत्तिबाट प्रताडित हुँदै आएका छौँ र पछिल्ला वर्षहरूमा जलवायु परिवर्तनका कारण थप कष्ट र पीडा व्यहोर्न विवश छौँ । त्यसैले कुनै पनि बेला आउन सक्ने प्राकृतिक विपत्तिको प्रतिकार्यका लागि सजगताका साथ प्रभावकारी पूर्व तयारी गर्न र घटना घटेमा उद्धार, राहत तथा पुनर्स्थापनामा सम्बन्धित निकायले समयमै ध्यान पुर्याउनु पर्ने विषयमा ध्यान दिनु पर्दछ ।
पूर्वराष्टपति भण्डारीले जारी गर्नुभएको बिज्ञप्तिमा भनिएको छ – मुलुकमा सामाजिक आर्थिक विकासको प्रक्रियालाई तीब्र पारेर जनताको जीवनस्तर माथि उकास्न राज्य अग्रसर हुनैपर्दछ । हाम्रो देशले विकासको गतिलाई तीव्र पार्न प्रयास गर्दै आएको छ र जनता यसमा सामेल हुँदै पनि आएका छन् । यस्तो आर्थिक विकासको परिणामस्वरुप भौतिक पूर्वाधारमा बढोत्तरी भइरहेको अवस्था छ । देशका विभिन्न क्षेत्रमा वस्ती विकास भइरहेका छन् भने शहरीकरण प्रक्रियाले तीव्रता पाएको छ । एकातिर वस्ती विकाससहित व्यापारिक प्रयोजनका लागि भवन र संरचनाको निर्माण भइरहेको छ भने अर्कातिर जलवायु परिवर्तनले गर्दा अप्रत्यासित रूपमा बाढी, पहिरो र डुबानजस्ता प्राकृतिक विपत्तिहरूको सामना गर्नु परिरहेको छ ।
पूर्वराष्टपति भण्डारीले जारी गर्नुभएको बिज्ञप्तिमा भनिएको छ – हामीले हाम्रा भौतिक संरचनाहरूको विकास गर्दा प्रचलित कानुनको परिपालना, मापदण्डको अनुशरण, परम्परागत दिगो प्रविधि तथा जलवायु परिवर्तनले पार्न सक्ने प्रभावलाई ख्याल गर्नसकेको खण्डमा प्राकृतिक विपत्तिबाट जनधनको क्षतिलाई न्यून पार्न सकिन्छ । यस विषयमा सरकार, राजनीतिक दल, जनप्रतिनिधिहरू, सामाजिक संघ–संस्थाहरू, नागरिक समाज लगायत सबै पक्षलाई एकताबद्ध भई यो राष्ट्रिय विपत्तिको सामना गर्न आह्वान गर्दछु ।
