काठमाडौँ । नयाँ सत्ता समीकरणका दुई ठूला दल नेपाली कांग्रेस र नेकपा एमालेले छलफल तीव्र पारेका छन् ।
अहिले प्रमुख प्रतिपक्ष रहेको कांग्रेसले एमाले अध्यक्ष केपी शर्मा ओलीलाई प्रधानमन्त्री बन्न प्रस्ताव गरेसँगै नयाँ सत्ता समीकरण बनेको हो । त्यसमा एमालेको सकारात्मक प्रतिक्रिया रहेको स्रोत बताउँछ ।
असार १५ मा कांग्रेस सभापति शेरबहादुर देउवा बालकोटस्थित एमाले अध्यक्ष ओली निवासमा पुगेसँगै दुई दलबीच सत्ता सहकार्यका लागि छलफल अघि बढेको हो ।
स्रोतहरूका अनुसार कांग्रेसले एमाले अध्यक्ष केपी शर्मा ओलीलाई पहिलो चरणमा प्रधानमन्त्री स्वीकार्न तयार भएको छ ।
संसदको कार्यकाल साढे तीन वर्ष बाँकी छ । उक्त अवधिमा एमाले र कांग्रेसले आलोपालो सरकारको नेतृत्व गर्ने गरी समझदारी बन्न लागेको हो । आधा कार्यकाल ओली र त्यसपछिको आधा देउवा प्रधानमन्त्री बन्ने प्रस्ताव गरिएको छ ।
दुई ठूला दल नमिलेसम्म सधैँ तेस्रो र चौथो पार्टीले सरकारको नेतृत्व गर्दा अस्थिरता निम्त्याउने भएकाले देउवा र ओली सहकार्यमा सकरात्मक रहेको स्रोत बताउँछ ।
