काठमाडौँ । प्रधानमन्त्री पुष्पकमल दाहालले नेकपा (एकीकृत समाजवादी) को राजनीतिक दस्ताबेजमा आफूलाई अस्थिरताको कारक बनाएको भन्दै आपत्ति जनाउनुभएको छ ।
आईतवार नेकपा (एकीकृत समाजवादी) को राष्ट्रिय महाधिवेशनलाई सम्बोधन गर्दै उहाँले आपत्ति जनाउनुभएको हो । उहाँले विभिन्न राजनीतिक शक्तिहरुको मूल्यांकन गर्दा नेकपा (माओवादी केन्द्र) लाई नजिकको शक्ति र आफूलाई अस्थिर भनेको भन्दै आपत्ति जनाउनु भयो । उहाँले राजनीतिक दलको भन्ने अधिकारमाथि प्रश्न उठाउने कुरा नहुने भन्दै पुनःविचार गर्न भने आग्रह गर्नुभयो । उहाँले संघीय लोकतान्त्रिक गणतन्त्र आफू अलिकति अस्थिर नभएको भए सम्भव नरहेको पनि बताउनु भयो ।
उहाँले आफू अस्थिर नभएको भए जनयुद्ध नै नहुने जिकिर गर्नुभयो । उहाँले आफू केही अस्थिर भएकाले नै अहिले समृद्धिको अभियान चलेको दाबी गर्नुभयो । उहाँले गतिशिलता भनेको के हो ? द्वन्दात्मक भौतिकवाद हरेक चिज निरन्तर परिवर्तनको प्रवाहमा हुन्छ, प्रक्रियामा हुन्छ भनेको के हो ? भन्दै प्रश्न गर्नुभयो ।
उहाँले एक ठाउँमा ठोक्किएर बसिराख्नु माक्सवाद नभइ गड्गडाउँदो नदी जस्तो भएर हुर्रिनु नै माक्सवाद भएको बताउनु भयो । उहाँले माक्सवाद जमेको पोखरी जस्तो नभएको बताउनु भयो । उहाँले ठोस परिस्थितिको ठोस विश्लेषण गरेर परिस्थितिअनुसार निस्कर्ष निकाल्नु माक्सवाद भएको बताउनु भयो ।
उहाँले भन्नुभयो, ‘तपाईंहरुले विभिन्न राजनीतिक शक्तिहरुको मूल्यांकन गर्दा हामीलाई अलि नजिकको शक्ति पनि भन्नुभएको छ । साथसाथै अलि बढी अस्थिर पनि भन्नुभएको छ । तपाईंहरुलाई त्यो भन्ने अधिकारमाथि म प्रश्न उठाउन चाहन्न । हरेक राजनीतिक पार्टीले अर्को राजनीतिक पार्टीलाई हेर्ने दृष्टिकोण आफ्नो बनाउन जरुरी पनि छ । तपाईंहरु बनाउनुस् ।
तपाईंहरुलाई जे बनाउन उचित लाग्छ, त्यो बनाउने अधिकार क्षेत्र भित्रको कुरा हो । आज नेपाल संविधान सभामा गयो । संघीय लोकतान्त्रिक गणतन्त्रमा गयो । शान्ति प्रक्रिया भयो । समृद्धिको अलि नयाँ अभियान चलेको छ । प्रचण्ड अलि अस्थिर नभएको भए हुँदैन थियो । प्रचण्ड अस्थिर नभएको भए जनयुद्ध पनि हुँदैन थियो । प्रचण्ड अलि अस्थिर इन्भटेट कमाको अस्थिर है फेरि साँच्चै अस्थिर नठान्नु । अस्थिर नभएको भए शान्ति प्रक्रिया पनि हुँदैन थियो ।
अस्थिर नभएको भए यो प्रक्रियामा हामी यहाँ आइपुग्ने पनि थिएनौँ । अर्को कोही छ ? म यो प्रश्नबारे तपाईं सबै साथीहलाई गतिशिलता भनेको के हो ? द्वन्दात्मक भौतिकवाद हरेक चिज निरन्तर परिवर्तनको प्रवाहमा हुन्छ, प्रक्रियामा हुन्छ भनेको के हो ? किलो जस्तो एक ठाउँमा ठोक्किएर बसिराख्नु माक्सवाद हो की जमेको पानीको पोखरी जस्तो माक्सवाद हो की गड्गडाउँदो नदी जस्तो भएर हुर्रिने माक्सवाद हो ? तपाईंं सबैले यो कुरा विचार गर्नुपर्छ ।
मार्क्सवाद जमेको पोखरी जस्तो होइन । एउटा कुरा भनेपछि भन्यो भन्यो होइन । ठोस परिस्थितिको ठोस विश्लेषण गरेर परिस्थितिअनुसार निस्कर्ष निकाल्नु माक्सवाद हो । हामी एक ठाउँमा बस्ने भन्ने हुँदैन । हामी दौडिरहेका हुन्छौँ ।’
प्रधानमन्त्री दाहालले नेकपा (माओवादी केन्द्र) र नेकपा (एकीकृत समाजवादी) अहिले पनि समाजवादी मोर्चामा सँगै रहेको र मोर्चा हुँदै कम्युनिष्ट आन्दोलनको एकता कायम गर्ने उद्देश्यमा समान धारणा रहेको बताउनु भयो । कम्युनिष्टहरुले निराशावादी भएर सोच्न नहुने बताउनु भयो ।
