काठमाडौंः प्रधानमन्त्री केपी शर्मा ओलीले पार्टीभित्र विवाद रहे पनि आफूहरुले कुनै पनि दल वा नेतालाई प्रधानमन्त्री बनिदिन प्रस्ताव नगरेको स्पष्ट गर्नु भएको छ ।
नेपाल कम्युनिष्ट पार्टी (बिप्लब) सँग तीन बुँदे सम्झौतामा हस्ताक्षर गर्न आयोजित समारोहलाई सम्बोधन गर्दै प्रधानमन्त्री ओलीले भन्नुभयो, “आफ्नो दुई तिहाईको सरकारलाई ढालेर अरु कसैलाई प्रधानमन्त्री बनिदिनुस् भनेर किस्तीमा राखेर हिँडेका छन् ।”
प्रधानमन्त्री पदका बारेमा भ्रम छर्ने प्रयास भइरहेको भन्दै प्रधानमन्त्री ओलीले “हामीले अनुचित ढंगले कसैलाई प्रधानमन्त्रीको प्रस्ताव राख्नेवाला पनि छैनौं, कसैलाई प्रधानमन्त्री पद प्रस्ताव पनि राख्दैनौं” भन्नुभयो ।
प्रचण्ड–माधव पक्षको संसदीय दलको बैठक बसेको प्रति कटाक्ष गर्दै प्रधानमन्त्री ओलीले भन्नुभयो, “आज संसदीय दलको बैठक भन्दैछन् रे । दलको नेता म यहाँ छु, कुन दलको बैठक हो कुन्नि मलाई थाहा छैन ।”
