काठमाडौँ । नेपाल आइसीसी यु–१९ विश्वकप क्रिकेट प्रतियोगिताअन्तर्गत सुपर सिक्समा प्रवेश गरेको छ । भर्खरै सम्पन्न खेलमा अफगानिस्तानलाई एक विकेटले हराउँदै नेपाल सुपर सिक्समा पुगेको हो ।
१४६ रनको लक्ष्य पछ्याएको नेपालले ४४.४ ओभरमा ९ विकेटको क्षतिमा लक्ष्य पूरा गर्यो । नेपालका लागि कप्तान देव खनालले अर्धशतकीय इनिङ्स खेले । उनले ८९ बलमा ५८ रन बनाए । यस्तै, दिपक बोहराले ४२ बलमा २७ रन जोडे । आकाश त्रिपाठीले १६, अर्जुन कुमालले १० रन बनाए । यस्तै, सुवाश भण्डारी ९ रनमा अविजित रहे ।
त्यसअघि दक्षिण अफ्रिकामा टस जितेर पहिला ब्याटिङ गरेको अफगानिस्तानले निर्धारित ५० ओभरको खेलमा ४० दशमलव एक ओभरमा सबै विकेट गुमाउँदै १४५ रन बनायो ।
अफगानिस्तानका लागि अल्लाह मोहम्मद घनजानफरले सर्वाधिक ३७ रनको योगदान दिए । उनले २१ बल खेल्ने क्रममा चार चौका र तीन छक्का हिर्काए । त्यस्तै नासिर खानले ८३ बलको सामना गर्दै तीन चौकाको मघतमा ३१ रन बनाए । फरिदुन दवुदजैले २९ तथा हसन इसाखिलले २० रन बनाए ।
बलिङतर्फ नेपालका आकाश चन्द एक्लैले पाँच विकेट लिए । यस्तै दिपेश कँडेलले दुई तथा गुल्सन झा, सुवास भण्डारी र तिलक भण्डारीले एक एक विकेट लिए ।
