एजेन्सी । साउथ अभिनेता विजय सेतुपति यतिबेला आफ्नो फिल्म ‘मेरी क्रिसमस’लाई लिएर चर्चामा छन् । यस फिल्ममा विजयसँग कट्रिना कैफ देखिएकी छिन् । यो फिल्मपछि अब विजय सेतुपति फिल्म ‘रामायण’मा देखिने खबर बाहिर आएको छ ।
नितेश तिवारीको बहुप्रतिक्षित फिल्म ‘रामायण’ले सन् २०२४ मा रिलिजको लागि निकै उत्साह पैदा गरेको छ । यस फिल्ममा रणवीर कपुर, साई पल्लवी र यशको अभिनय रहेको खबर पहिले नै बाहिर आएको छ । फिल्मको स्टार कास्टमा विजय सेतुपति पनि सामेल भएको खबर छ ।
मिडिया रिपोर्टका अनुसार विजय सेतुपति रामायणमा विभिषणको भूमिकामा देखिन सक्नेछन् । समाचारका अनुसार नितिश र विजयबीच छलफल चलिरहेको छ, जसमा विजयले रावणको भाइको भूमिका निर्वाह गर्ने अपेक्षा गरिएको छ । नितिश तिवारीले हालै विजयसँग फिल्मको कथाबारे छलफल गर्न भेट गरेको बताइएको छ ।
फिल्मको स्टार कास्ट फाइनल गरेपछि फिल्मको छायांकन मार्च २०२४ मा सुरु हुनसक्छ । दर्शकहरु यो चलचित्रको प्रतिक्षामा छन् । फ्यानहरू रणवीर कपूरलाई भगवान रामको भूमिकामा हेर्न निकै उत्सुक छन् ।
