विश्व फुटबलमा युरोपेली क्लबहरु निकै ठूला, प्रतिष्ठित र धनाढ्य मानिन्छन् । क्लबहरुले विश्वस्तरका खेलाडीमा राम्रै पैसा खर्च गर्ने भएकाले पनि यी क्लबहरु सधैं चर्चामा रहने गर्दछन् ।
स्पेनी क्लब बार्सिलोना त्यस्तै क्लबमा पर्दछ । यो क्लबले स्पेनी ला लिगा, च्याम्पियन्स लिग समेतका अनेक प्रतियोगिता पटकपटक जित्दै आएको छ । यसको स्तर केही खस्कियो भने विश्वभर नै खैलाबैला मच्चिन्छ ।
त्यही कारण क्लबले आफ्नो साख जोगाइराख्न हरेक वर्ष र सिजनमा नयाँ, अनुभवी र प्रतिभावान खेलाडीको खोजी गरिरहेको हुन्छ । बार्सिलोनामा लियोनेल मेस्सी जस्ता विश्वस्तरका खेलाडी छन्, तैपनि यो क्लबले यस वर्षको च्याम्पियन्स लिगमा राम्रो नतिजा निकाल्न सकेन, र क्लब आठ उत्कृष्ट टीममा पर्न सकेन । अन्तिम १६ मा फ्रेन्च क्लब पेरिस सेन्ट जर्मेनसँग दुबै लेगमा पराजित भएपछि बार्सिलोना च्याम्पियन्स लिगबाट बाहिरिएको छ ।
च्याम्पियन्स लिगबाट बाहिरिनु परेको चोट मेटाउन अहिले क्लबले अर्का अर्जेन्टिनी फर्वाड सर्जियो अग्वेरोलाई क्लबमा ल्याउन पहल शुरु गरेको छ । मेस्सी र अग्वेरो दुबै अर्जेन्टिनी फुटबलका फर्वार्ड हुन् । हाल म्यान्चेस्टर सिटीमा खेल्दै गरेका ३२ वर्षीय अग्वेरोको कन्ट्राक्ट यसै सिजनको अन्त्यमा सकिँदैछ ।
टिकस्पोर्टसमा छापिएको समाचारमा अग्वेरोले क्लब छाड्ने वा नछाड्ने अथवा के कति रकममा स्थानान्तरण हुने भन्ने केही खुलाइएको छैन । तर करार सकिएसँगै अग्वेरोले क्लब छान्न पाउने छन् ।
स्थानान्तरणमा चासो देखिएका अरु खेलाडी
इङलिस प्रिमियर लिगको प्रमुख क्लब चेल्सीले जर्मन स्ट्राइकर टिमो वर्नरलाई यसै समर सिजनमा बिक्री गर्ने सम्भावना रहेको फुटबल इन्साइडरले जनाएको छ । उनी आरबी लाइपजीगबाट ५ करोड ४० लाख पाउन्डमा चेल्सीमा अनुबन्धित भएका थिए ।
म्यान्चेस्टर युनाइटेडमा यसै सिजनमा अनुबन्धित भएका ३४ वर्षीय उरुग्वेली फर्वार्ड एडिन्सन काभानी अर्को सिजनमा युनाइटेडमै रहने सम्भावना न्यून देखिएको छ । उनका बुबाले काभानी अर्को सिजनमा बोका जुनियर्समा जान सक्ने बताएका छन् ।
विश्व फुटबलका महारथी क्रिस्टियानो रोनाल्डोको खराब फर्मलाई लिएर चर्चा चुलिएसँगै उनले इटालीयन क्लब युभेन्टस छाड्ने सम्भावना पनि बढेको छ । यस वर्षको च्याम्पियन्स लिगबाट क्लब विदा भएकाले पनि युभेन्टसले यस सिजनको अन्त्यबाट रोनाल्डोलाई विदा दिने सम्भावना बढेको छ ।
लिभरपुलले ब्राजिलको सान्तोस क्लबका १६ वर्षे खेलाडी एन्जेलो गाब्रियललाई भित्र्याउन चाहेको छ ।
