काठमाडौ । नेकपा एमाले माधव कुमार नेपाल पक्षले सबै जिल्लामा समानान्तर कार्यालय सञ्चालन गर्ने निर्णय गरेको छ । प्रधानमन्त्री तथा अध्यक्ष केपी शर्मा ओलीले शुक्रबार गरेको निर्णयलाई अस्वीकार गर्दै समानान्तर कार्यालय सञ्चालन गर्ने निर्णय गरेको हो । त्यसैगरी जिल्ला तथा कमिटीहरुमा आफ्ना मान्छे नभएको स्थानमा समानान्तर कमिटी पनि बनाउने निर्णय सो समूहले गरेको छ ।
शुक्रबार साँझ अर्याल होटल बानेश्वरमा राजधानीमा उपलब्ध स्थायी समिति र केन्द्रीय सदस्यहरुको भेलाले पहुँच पुगेको जिल्लामा पार्टी कार्यालय नछाड्ने र अन्य स्थानमा नयाँ कार्यालय सञ्चालन गर्ने निर्णय गरेको हो ।
एक केन्द्रीय सदस्यका अनुसार पार्टी अब मुठभेडको अवस्थातर्फ अग्रसर हुन थालेको भन्दै मातहतका कमिटीलाई सोही अनुसार निर्देशन दिएको जानकारी दिनुभयो । यसै गरी अध्यक्ष ओलीले बोलाएको बैठकमा सहभागी नहुने र चैत्र ४ गते राजधानीमा बृहत कार्यकर्ता भेला गर्ने निर्णय पनि नेपाल पक्षले गरेको छ ।
नेपाल पक्षको छलफल चलिरहेको बेला नेता वामदेव गौतमले नेता नेपाललाई फोन गर्दै तत्काल पार्टी कार्यालय सञ्चालन गर्ने र कानूनी उपचार पनि खोज्ने बाटोमा जानु पर्ने भन्दै आफू पनि सहभागी हुने जानकारी गराउनु भएको थियो ।
गौतमको प्रस्तावलाई भेलामा राखेपछि केही सदस्यहरुले संक्रमणको समयमा नेता गौतमले पूर्ण रुपमा साथ नदिएको हुँदा उहाँको कुरालाई प्राथमिकता दिन आवश्यक नभएको टिप्पणी गरेका थिए ।
