काठमाडौँ । चर्चित हलिउड तथा चिनियाँ अभिनेता जेट ली नेपाल आएका छन् । केही दिनअघि काठमाडौँ आएका उनी हाल बौद्धको एक गुम्बामा छन् ।
बौद्ध गुरु छोकी निमा रिम्पोछेसँग बौद्ध दर्शनको कक्षा लिन उनी नेपाल आएको बताइएको छ । जेट लीसँगै शनिबार अभिनेत्री मनिषा कोइराला पनि उक्त गुम्बामा पुगेकी थिइन् ।
रिम्पोछेले बौद्ध गुम्बामा दुई दिनसम्म दिएको बौद्ध कक्षामा अभिनेता जेट ली सहभागि थिए । उनी छोरी र केही सहयोगीसँगै काठमाडौंमा आइपुगेका हुन् । सन् २०२३ को क्रिसमस मनाउन पनि जेट ली काठमाडौँ आइपुगेका थिए ।
यसपटकको उनी नेपाल आउनुको कारण विस्तृत रुपमा बताइएको छैन । अभिनेता ली बौद्ध दर्शनप्रति अभिरुचि राख्छन् ।
उनी चिनियाँ फिल्म अभिनेता, निर्माता, मार्शल आर्ट्सका कलाकार र सेवानिवृत्त उसु च्याम्पियन समेत हुन् । सन् १९८२ को चिनियाँ फिल्म ‘साओलिन टेम्पल’बाट उनले अभिनयमा डेब्यु गरेका थिए ।
उनी अन्तिम पटक २०२० को फिल्म मुलानमा देखा परेका थिए । उनले ४७ भन्दा बढी फिल्ममा अभिनय गरेका छन् ।
