एजेन्सी । चार विषयमा स्नातकोत्तर र कानुनमा पिएचडी गरेपछि जो कोहीले पनि आफूलाई सेतो रङको जागिरमा हेर्न चाहन्छन्, तर त्यसको बाबजुद पनि त्यो जागिरमा परिवारको खर्च धान्न मुस्किल पर्दा ती व्यक्ति जे सुकै गर्न तयार हुन्छ ।
पञ्जाबका डाक्टर सन्दीप सिंहसँग पनि यस्तै भएको छ । ३९ वर्षीय डा. सन्दीप सिंह पञ्जाबी विश्वविद्यालय, पटियालामा एक अनुबंधित प्रोफेसर थिए । तर, परिस्थितिका कारण उनले जागिर छोडेर तरकारी बेचेर पैसा कमाउन थाले ।
डा. सन्दीप सिंह पञ्जाबी विश्वविद्यालयको कानुन विभागमा ११ वर्षसम्म करारमा प्राध्यापक थिए । उनले कानुनमा पिएचडी गरेका छन् । पञ्जाबी, पत्रकारिता र राजनीति शास्त्र सहित चार स्नातकोत्तर डिग्री गरेका छन् र अझै पनि आफ्नो पढाइलाई पछ्याउँदै छन् ।
तलब कटौती र अनियमित तलबजस्ता अवरोधको सामना गर्दै डा सन्दीप सिंहले जागिर छाडेको बताइएको छ । उनले भने, ‘समयमै तलब नपाएको र पटक–पटक तलब कटौती हुने गरेकोले जागिर छाड्नुपरेको हो । मलाई त्यो जागिरबाट बाँच्न गाह्रो भयो, त्यसैले मैले आफ्नो र मेरो परिवारको लागि जीविकोपार्जन गर्न तरकारी बेच्न थालें ।’
आफ्नो तरकारी ठेला र त्यसमा ‘पिएचडी सब्जीवाला’ बोर्ड लगाएर, डा. सन्दीप सिंह हरेक दिन घर–घरमा तरकारी बेच्छन् । घरघरमा तरकारी बेच्ने डा सन्दीप सिंह करारमा प्राध्यापक भएर आफुले पाएको भन्दा बढी तरकारी बेचेर कमाएको बताउँछन् । तरकारी बेचेर घर फर्केर परीक्षाको तयारी गर्न पढ्छन् । डा. सन्दीप सिंहले अध्यापनबाट विश्राम लिए पनि आफ्नो जोश छाडेनन् । उनी पैसा बचत गरेर एक दिन आफ्नै ट्युसन सेन्टर खोल्न चाहन्छन् ।
