काठमाडौँ । नेकपा एमालेका अध्यक्ष केपी शर्मा ओलीले बालकुमारी घटनामा ज्यान गुमाउने युवाका परिवारका अन्य सदस्यलाई सरकारले रोजगारी र राहत दिनुपर्ने बताउनुभएको छ ।
सामाजिक सञ्जालमार्फत अध्यक्ष ओलीले बालकुमारी घटनामा ज्यान गुमाएकाको परिवारजनका पीडाका खबर पढेर आफ्नो मन बेचैन भइरहेको जनाउँदै सरकारसमक्ष यस्तो आग्रह गर्नुभएको हो ।
यस्तै, अध्यक्ष ओलीले छानबिन समिति बनाउने र छानबिनको प्रतिवेदन घर्रामा थन्क्याउने गल्ती नहोस् भन्दै सचेत समेत गराउनुभएको छ ।
उहाँले सामाजिक सञ्जालमा लेख्नुभएको छ– ‘बालकुमारी घटनामा ज्यान गुमाएका २३ वर्षीय सुजन रावत र २२ वर्षीय वीरेन्द्र शाहको परिवारजनका पीडाका खबर पढेर मन बेचैन भइरहेको छ । छोरा सुजनको अनायास हत्यापछि उनकी विधवा आमाको अवस्थाले मन पोल्छ । कोरिया जाने तयारीमा रहेका सन्तानको हत्याबाट आहत परिवारका अन्य सदस्यलाई सरकारले रोजगारी र राहत दिनुपर्छ। छानबिन समिति बनाउने र छानबिनको प्रतिवेदन घर्रामा थन्क्याउने गल्ती नहोस्।’
