काठमाडौँ — नेकपा एमालेले पार्टीका वरिष्ठ नेता माधव कुमार नेपाल र उपाध्यक्ष भीम रावललाई पार्टी सदस्यबाट छ महिनाका लागि निलम्बन गरेको छ ।
पार्टीले सोधेको स्पष्टिकरण चित्त नबुझ्दो भएको भन्दै साधारण सदस्यबाट नै निलम्बन गरिएको र चित्तबुझ्दो परिस्थिति नदेखिए बीचमै निलम्बनको अवधि थप गर्न सकिने जानकारी गराइएको छ । नेपाल र रावललाई सच्चिनका लागि अन्तिम मौका दिइएको पनि पत्रमा भनिएको छ । आफ्ना क्रियाकलाप सच्याएर पार्टीका पक्षमा लाग्न निर्देश गर्दै अगाडि भनिएको छ, तपाईंलाई सच्चिनका लागि यो अन्तिम मौका हो ।
आफ्ना विचार र क्रियाकलापहरू सच्याई पार्टीका पक्षमा आएमा पार्टीले निलम्बन अवधिको बीचमा पनि निलम्बनको अवधि घटाउने निर्णय गर्न सकिने र सच्चिन दिएको मौकालाई पार्टीको कमजोरी ठानी पार्टी विरोधी गतिविधिहरू कायमै राखेमा निलम्बन अवधिको बीचैमा थप कारबाही गर्न सकिने व्यहोरासमेत जानकारी गराइन्छ ।
यसअघि पार्टीका तर्फबाट सोधिएको स्पष्टीकरणमा तपाइँले पार्टी एकतालाई विखण्डन गर्ने, पार्टी फुटाउने, पार्टी भित्रको सहकार्य र सदभावलाई क्षतविक्षत पार्ने गरी निरन्तर अवैधानिक गुट भेला तथा पार्टीका कुभलो चिताउनेहरुसँग निरन्तर बैठक भेटघाट गर्ने तथा उनीहरुको पक्षपोषण गर्ने कार्य निरन्तर गरिरहनु भई उक्त कार्यलाई निरन्तरता दिने स्वीकारोक्ती सहित अहंकार र आत्मकेन्द्रित कुराहरु गर्नु भएको छ ।
स्पष्टीकरणमा सोधिए अनुसार आफ्नो भुलत्रुटीको स्वीकारोक्ती नगरेको, कुनै आत्मसमीक्षा नगरिएको, आत्मआलोचना गर्ने कुनै प्रवृत्ति नदेखिएको समेतका आरोप लगाउँदै अगाडि भनिएको छ, तपाईंले अहिले पनि पार्टी विरोधी फाटोवादी र गुटगत क्रियाकलापहरु नेकपा एमालेकै नाममा गरिरहनु भएको छ ।
