आज पार्टी अध्यक्ष केपी ओलीबाट कारबाहीमा परेका नेकपा एमालेका वरिष्ठ नेता माधव कुमार नेपालले नेकपा एकीकृत नामको नयाँ दल दर्ता गर्ने तयारी गर्नुभएको छ ।
उहाँले नेकपा एमाले परित्याग गरेर नयाँ दल दर्ता गर्ने अन्तिम तयारी भएको सूचनाका आधारमा आज पार्टी अध्यक्ष एवं प्रधानमन्त्री केपी ओलीले उहाँ र सो पार्टीका अर्का नेता भिम रावललाई छ महिनाका लागि पार्टीबाट निष्कासन गर्ने कारबाही गर्नुभएको थियो ।
समाचार स्रोतले भन्यो– सो पार्टी दर्ताको अन्तिम तयारी भएको छ, पार्टीको नाम पनि जुरेको छ, सायद यसै हप्ता दर्ता हुन सक्छ, सबै कागजात पूरा भएको छ ।
त्यस प्रयोजनका लागि भिम रावल पनि खटेको स्रोतले बतायो । यताबाट भिम रावल र उता माओवदी केन्द्रका तर्फबाट नारायणकाजी श्रेष्ठ पनि सो यो नयाँ दल जन्माउने प्रयोजनका लागि लागेको स्रोतले बतायो ।
माधव नेपाल पक्षका एकजना एमाले नेताले भने– कोटेश्वरमा रहेका एकजना व्यापारीको निवासमा केही दिनयता देखि यो कार्य निरन्तर जारी छ, यताबाट भिम रावल र उताबाट नारायणकाजी लाग्नुभएको छ, समय समयमा माधव नेपाल र प्रचण्डले पनि आवश्यक परामर्श दिइरहनुभएको छ ।
ती नेताका अनुसार पछि यही दलमा माओवादी केन्द्र पनि मिस्सिने र नेकपा एकीकृतका नाममा अघि बढ्ने सहमति नेपाल र दाहालबीच भएको छ ।
यस अवधारणामा माधव नेपाल पक्षका एक दुई जनाबाट सबैजसो नेताको कुरा मिलेको छ र उता माओवादीमा पनि सो नाम नराख्ने भन्दै शुरु भएको बहसमा यसले निकास पाउने देखिएको छ ।
उहाँहरुले सो दलमार्फत् एकसाथ अघि बढ्ने साझा धारणा बनाएर दल दर्ताको प्रक्रिया थालेपछि र सम्भवत यसै हप्तातिर सो दल दर्ता हुन लागेको भन्ने थाहा भएपछि यता ओलीले उहाँहरुलाई कारबाही गर्नुभएको हो ।
यो संसदले निकास दिएको छैन र उता प्रधानमन्त्री आफैले विघटन गरेको यो संसदको अन्त्यको निहूँ खोजेर बसिरहेको स्पष्टै देखिन्छ । यदि त्यस्तो भयो र फेरि पनि संसद विघटन गरेर निर्वाचनको आह्वान भयो भने नयाँ दल दर्ता गर्न मिल्दैन ।
त्यसैले पनि अहिले नै नयाँ दल दर्ता गरेर यसअघिको दाहाल नेपाल गठबन्धनलाई पार्टीका रुपमा एकीकरण गरेरै अघि लैजाने प्रक्रियाका लागि उहाँहरु लाग्नुभएको समाचार स्रोतले बताएको छ ।
