काठमाडौं । सन्दीप लामिछानेविरुद्धको मुद्दामा जाहेरीकर्ता गौशाला २६ लाई उपचार खर्च भराउन जिल्ला अदालत काठमाडौंले आदेश दिएको छ ।
जिल्ला अदालतका न्यायाधीश प्रकाशप्रसाद पण्डितको इजलासले पीडित राहत कोषबाट गौशाला २६ लाई अन्तरिम राहत स्वरुप उपचार खर्च दिन आदेश दिएको हो ।
गौशाला २६ ले शारीरिक र मानसिक स्वास्थ्यको उपचार गराउँदा लागेको खर्चको क्षतिपूर्ति सन्दीपबाटै पाउनुपर्ने माग गर्दै जिल्ला अदालतमा निवेदन दिएकी थिइन् । उनले करिव ७० हजार रुपैयाँ खर्च भएको भन्दै बिल पेश गरेकी थिइन् । अस्पतालका चिकित्सकको बकपत्र समेत पेश गरेपछि अदालतले उपचार खर्चवापत १ लाख रुपैयाँ उपलब्ध गराउन आदेश दिएको हो ।
सन्दीपका वकिलहरूले भने बलात्कार भएको ठहर नै नभइकन क्षतिपूर्ति दिन नमिल्ने भन्दै निवेदनको प्रतिवादमा बहस गरेका थिए ।
सन्दीप अहिले जिम्बाबेमा छन् । सर्वोच्च अदालतमा पेशी सार्न निवेदन दिएर उनी राष्ट्रिय टीमबाट क्रिकेट खेल्न जिम्बाबे गएका हुन् । उनी असार २४ मा फर्किने बताइएको छ ।
