बजेट असन्तुलित भयो, बाटो छलेर हिँड्नुपर्ने स्थिति छ– सुदन किराँती

काठमाडौं । संस्कृति, पर्यटन तथा नागरिक उड्यनमन्त्री सुदन किराँतीले बजेट सन्तुलित बनाउन नसकेकोप्रति माफी मागेका छन् ।

सोमबार प्रतिनिधिसभामा बजेटमाथि मन्त्रालयगत छलफलमा सांसदहरूले उठाएको प्रश्नको जवाफ दिँदै उनले बजेटको सीमाको कारणले धेरै कुरा अटाउन नसकिएको बताए ।

उनले बजेट असन्तुलित भएपछि बाटो छलेर हिँड्नुपर्ने स्थिति आएको उल्लेख गर्दै बजेटले सुख बाँड्नुपर्नेमा दु:ख बाँडेको बताए । ‘हाम्रो कुरा नीति तथा कार्यक्रममा किताबमा सबै अटाएनन् । अटाएको कुरा पनि बजेटको सीमाको कारणले कार्यक्रममा ढाल्नै सकिएन । सदाको झैं हाम्रो मन्त्रालयको सिलिङ बजेट जिरो थियो । धेरै योजना अटाउनै सकिएन ।’, किराँतीले भने, ‘सबैको चित्त प्रसन्न बनाउनै सकिएन । बाटो छलेर हिँड्नुपर्ने स्थिति छ । स्वाभाविक रूपमा बजेट असन्तुलित हुन गएको छ । त्यसका लागि म क्षमाप्रार्थी छु ।’