हेटौंडा । बागमती प्रदेश सरकारमा नेपाली कांग्रेसले ६ मन्त्रालय दाबी गरेको छ । कुल ११ मन्त्रालय रहेको बागमती प्रदेश सरकारमा कांग्रेसले मात्रै ६ वटा मन्त्रालयमा दाबी गरेको हो ।
नेकपा एमालेले सत्ता छाडेपछि मुख्यमन्त्री शालिकराम जम्कट्टेलले दोस्रो पटक विश्वासको मत प्राप्त गरेका थिए । एमाले र राप्रपाले सरकार छाडेपछि अहिले मुख्यमन्त्री जम्कट्टेलले ७ वटा मन्त्रालय सम्हालिरहेका छन् ।
बागमतीमा कांग्रेसको ३७, माओवादी केन्द्रको २१ र एकीकृत समाजवादीको ७ सीट रहेको छ । जसमध्ये कुल ११ मन्त्रालयमा कांग्रेसले आर्थिक मामिलासहित ६ वटा मन्त्रालय र नेकपा एसले ३ वटा मन्त्रालयमा दाबी गरेको छ ।
नयाँ सत्ता समीकरण अनुसार कांग्रेस र नेकपा एसले मात्रै नौँ वटा मन्त्रालयमा दाबी गरेपछि मुख्यमन्त्री जम्कट्टेललाई मन्त्रालय भागबन्डामा समस्या परेको छ ।
