काठमाडौं । समकालीन नेपालका सुपरिचित अर्थशास्त्री डा विश्वनाथ पौडेलले राष्ट्रिय योजना आयोगको उपाध्यक्ष पदबाट राजीनामा दिनु भएको छ । पौडेलले असोज २० गतेदेखि लागू हुने गरी पदबाट राजीनामा दिनु भएको हो ।
चितवन क्षेत्र नम्बर १ बाट नेपाली कांग्रेसको उम्मेदवार हुने भएपछि पौडेलले प्रधानमन्त्री तथा मन्त्रिपरिषदको कार्यालयमा राजीनामापत्र बुझाउनु भएको हो । निर्वाचन आचार संहिता एवं कानुनमा कुनै लाभको पदमा रहेका व्यक्तिले प्रतिनिधिसभा र प्रदेश सभामा उम्मेदवारी दिन नपाउने व्यवस्था भएकाले उहाँले राजीनामा दिनु भएको हो ।
शेर बहादुर देउवाको नेतृत्वमा सरकार गठन भएलगत्तै उहाँ २०७८ साउन १२ गते योजना आयोगको उपाध्यक्षमा नियुक्त हुनु भएको थियो । उहाँले करिब १४ महिना उपाध्यक्षका रुपमा योजना आयोगमा रहेर काम गर्नु भयो ।
