काठमाडौँ । लगातार दुई दिनसम्म परेको अविरल वर्षासँगै सप्तकोसी आफ्नो पुरानो धारमा फर्किएको छ । अविरल वर्षाले तटबन्ध भत्काएपछि ३४ वर्षपछि सप्तकोसी पुरानै धारमा फर्किएको हो । पूर्वतिर सुनसरीबाट बगेको सप्तकोसी अहिले पश्चिममा पर्ने उदयपुरतर्फ मोडिएको छ ।
विसं २०४५ मा कोसी बगेकै ठाउँमा अहिले फेरि कोसी पसेको हो । उदयपुरको बेलका नगरपालिका–८ को सिसौली बस्ती, वडा नं ९ को रंगशाला क्षेत्र, वडा नं ३ को जगनाथ, जुलेसी, एबिसी, सिर्जना, एकता, दुर्गा मन्दिर र जालपा लगायतका क्षेत्रमा कोसी पसेको छ । ३४ वर्षअघि पनि यो क्षेत्रमा कोसी पसेको थियो । अहिले ती क्षेत्रमा मानव बस्ती छन् ।
सप्तकोसीले धार परिवर्तन गरेसँगै बेलका नगरपालिकाका १, २, ३, ८ र ९ वडाका धौरीटापु, श्रीलंका टापु, भागलपुर, करैया, तपेश्वरी र सप्तरीको सप्तकोसी र कञ्चनरुप नगरपालिकाका साथै सुनसरीको बराह क्षेत्र नगरपालिकाको वडा नं ६ र ७ बढी प्रभावित भएका छन् ।
