काठमाडौं । आगामी असोजदेखि सरकारी तथा निजी सवारीसाधनमा इम्बोस्ड नम्बर प्लेट अनिवार्य गर्ने तयारी भएको छ। इम्बोस्ड नम्बर प्लेट वितरण प्रभावकारी हुन नसकेपछि सरकारले असोजदेखि अनिवार्य गर्न लागेको हो ।
सवारी साधनको सम्पूर्ण विवरण डिजिटल प्रणालीमार्फत अनुगमन गर्नका लागि इम्बोस्ड नम्बर प्लेट लागू गर्न लागिएको हो । विभागका प्राविधिक निर्देशक रामशरण पौडेलले इम्बोस्ड नम्बर प्लेटको प्रभावकारिताका लागि असोजदेखि अनिवार्य गर्ने तयारी भएको जानकारी दिनुभयो ।
उहाँले भन्नुभयो, असोजदेखि पहिलो चरणमा बागमती प्रदेशका सवारीलाई दर्ता, नवीकरण र नामसारी गर्न आउन इम्बोस्ट नम्बर प्लेट अनिवार्य गरिँदै छ ।
विभागले गत २०७४ साल भदौ ५ गतेबाट इम्बोस्ड नम्बर प्लेट वितरण सुरु गरेको थियो । तर सर्वोच्च अदालतले २०७४ फागुन १० गते सवारी साधनमा तत्काल इम्बोस्ड नम्बर प्रयोग नगर्न अन्तरिम आदेश दिएपछि वितरण रोकिएको थियो ।
सोही रिटलाई २०७५ मङ्सिर २७ गते सर्वोच्चले खारेज गरेपछि विभागलाई बाटो खुलेको छ।
