एजेन्सी । पश्चिम अफ्रिकी मुलुक गिनीमा सेनाले राष्ट्रपतिलाई अपदस्थ गरी सत्ता नियन्त्रणमा लिएको छ ।
सेनाले त्यहाँको राष्ट्रिय टेलिभिजनमा सम्बोधन गर्दै राष्ट्रपति अल्फा कोन्डेलाई अपदस्थ गरी सत्ता हातमा लिएको जानकारी दिएको छ ।
सेनाको घोषणाअघि राजधानी कोनाक्रीस्थित राष्ट्रपति कार्यालय नजिक दोहोरो गोली हानाहान भएको बताइएको छ ।
यता राष्ट्रसंघका महासचिव एन्टोनियो गुट्रेस र अफ्रिकी युनियनले सेनाको ‘कु’को निन्दा गर्दै राष्ट्रपति कोन्डेको अवस्था सार्वजनिक गर्न माग गरेका छन् ।
गिनी प्राकृतिक स्रोतसाधनका दृष्टिले धनी राष्ट्र हो । तर, दशकौ लामो अशान्ति र व्यवस्थापनको अभावमा ती अमूल्य स्रोतसाधन प्रयोगमा आउन सकेको छैन ।
हिंसाबीच गत वर्ष सम्पन्न निर्वाचनमा कोन्डे तेस्रो कार्यकालका लागि राष्ट्रपति चुनिएका थिए । उनी सन् २०१० मा पहिलोपटक विजयी भएका थिए ।
गिनीको अशान्तिकै कारण मोरक्कोविरुद्ध विश्वकपको छनोट खेल पनि स्थगित भएको छ । फिफाले सम्पूर्ण खेलाडी र खेल अधिकारीको सुरक्षाका लागि खेल स्थगित गरेको जनाएको छ ।