काठमाडौं । संखुवासभाको मादी नगरपालिका १ उम्लिङमा एकै परिवारका ६ जनाको विभत्स हत्या हुँदा बौद्धमान कार्की मात्रै जिवित रहेका छन् । ९० वर्षीय उनी राम्ररी कान सुन्दैनन् भने आँखा पनि धमिलो देख्छन् । बिरामी र वृद्धावस्थाले ओछ्यानमा थला परेका यी वृद्धले अब आफ्नो बाँकी जीवन एक्लै काट्नुपर्ने भएको छ ।
उनी भाग्यले बाँचेका हुन् वा हत्याराले उनलाई छोडिदिएका हुन् भन्ने प्रहरी अनुसन्धानबाट पत्ता लाग्ला । प्रारम्भिक बयानमा उनले आफूले केही थाहा नपाएको बताएका छन् । घटना घट्दा उनी घरमै थिए ।
७ वर्षकी बालिकादेखि ८४ वर्षकी वृद्धासम्मले ज्यान गुमाएका छन् । ५८ वर्षीय तेज कुमार कार्की, ५१ वर्षीय मन माया कार्की, २६ वर्षीय रञ्जना घिमिरे कार्की ९ वर्षीय दिपेन कार्की र ३ वर्षीय गोमा कार्कीको निधन भएको छ ।
प्रत्यक्षदर्शीहरुका अनुसार यो हत्याकाण्ड निकै रहस्यमय देखिएको छ । घटना कहिले र कतिबेला भएको हो भन्ने पनि एकिन हुन सकेको छैन । छिमेकीहरुलाई सोमबार बिहान ९ बजेमात्रै घटनाबारे थाहा भएको बताइएको छ । ६ जनाको शव यततत्र छरिएको अवस्थामा फेला परेको छ ।
६ जनामध्ये ४ जनाको शव छुट्टाछुट्टै ठाउँमा भेटिएको थियो । ५२ वर्षीया कमला कार्की र ३२ वर्षीया रञ्जना कार्कीको शव घर छेउको खोल्सामा भेटिएको छ । यस्तै छोरा तेजकुमार कार्कीको शव सडकमा भेटिएको छ । २ जना नातिनातिनी दिपेन र गोमाको शव घरमाथि खरबारीमा भेटिँदा ८४ वर्षीया पार्वतीको शव भने घरभित्रै फेला परेको थियो ।
बौद्धमानले कसैसँग आफूहरूको कुनै रिसइबी नभएको बताएका छन् । घटनाको छानविनका लागि तालिमप्राप्त कुकुरसहित प्रहरी उच्च अधिकारीको टोली त्यसतर्फ प्रस्थान गर्दैछ ।
