काठमाडौँ । पेट्रोलियम पदार्थमा लाग्दै आएको करमा प्रतिलिटर १० रुपैयाँले घट्ने भएको छ । केही दिनअघि बसेको मन्त्रिपरिषद्को बैठकले पेट्रोलियम पदार्थमा लाग्दै आएको करमा प्रतिलिटर १० रुपैयाँ घटाउन सैद्धान्तिक सहमति दिएको अर्थमन्त्रालयको भनाइ छ ।
अब नयाँ बजेटमा पेट्रोलियम पदार्थको करमा १० रुपैयाँ घटेर आउने छ । यद्यपि कुन कुन शीर्षकमा कर घटाउने हो भन्ने निर्णय हुन बाँकी रहेको बताइएको छ । आपूर्ति मन्त्रालयले मन्त्रिपरिषद् बैठकमा कर घटाउने प्रस्ताव लगेको थियो । कर घटाउँदा भन्सार र पूर्वाधार करमा पाँच/पाँच रुपैयाँ घटाउन सकिने समाचार छ ।
हाल नेपाल आयल निगमले सरकारलाई प्रतिलिटर पेट्रोलमा विभिन्न शीर्षकमा ५४ रुपैयाँ ४७ पैसा कर तिर्दै आएको छ । अर्थात उपभोक्ताले त्यति नै बराबरको कर तिर्दै आएका छन् । त्यस्तै उपभोक्ताले डिजेलमा सरकारलाई ३७ रुपैयाँ तिर्नुपरिरहेको छ ।
