काठमाडौं, ५ कात्तिक । नेपाली काँग्रेसका सहमहामन्त्री डा.प्रकाशशरण महतले महात्मा गान्धीले देखाउनुभएको अहिंसा र शान्तिको मार्गबाट मात्र एकता सम्भव रहेको बताउनुभएको छ ।
गान्धी पिस फाउन्डेसन, साउथ एसियन फ्राटर्निटी र मिरा फाउण्डेनद्वारा भारतको जोधपुरमा आयोजना गरिएको ‘दक्षिण एसियामा सांस्कृतिक विविधता, शान्ति र न्याय’ विषयक चार दिने कार्यशालालाई सम्बोधन गर्दै सहमहामन्त्री डा.महतले दक्षिण एसिया विश्वकै उच्च जनघनत्व भएको र सांस्कृतिक, भाषिक, भौगोलिक विविधता भएको क्षेत्र हो भन्नुभयो ।
पूर्व परराष्टमन्त्री समेत रहेका डा.महतले अहिंसा, शान्ति र न्यायपूर्ण व्यवस्थापनबाट मात्र विविधतामा एकता कायम हुनसक्ने र दक्षिण एसियाली देशहरुभित्र पारिवारिक सहयोग र शान्तिपूर्ण तरिकाबाट विवादहरुको समाधान उपयुक्त बाटो हुने धारणा राख्नुभयो ।
सहमहामन्त्री डा.महतले नेपालमा शान्तिपूर्ण आन्दोलनबाट नै समावेशी लोकतान्त्रिक संविधान जार िगर्न सम्भव भएको तर संविधानको कार्यान्वयन गर्न चुनौती रहेको बताउनभयो ।
महात्मा गान्धीले देखाउनुभएको अहिंसा र शान्तिको मार्गबाटै विविधताको बीचमा एकता, न्यायपूर्ण शासन र समृद्धि सम्भव हुने पनि उहाँले बताउनुभयो ।
उक्त गोष्ठीमा वरिष्ठ गान्धीवादी विचारक सतपाल ग्रोबरलगायत विभिन्न अग्रणी व्यक्तित्वहरुले आफ्नो बिचार राख्नुभएको थियो ।
उक्त गोष्ठीमा डा.महतसहित नेवि संघका केन्द्रीय सदस्य तथा इजु उपाध्यक्ष मदन भण्डारी र ने वि संघ भारतका महामन्त्री सूर्य न्यौपाने नेपालको तर्फबाट सहभागिता जनानुभएको थियो ।
उक्त गोष्ठीमा नेपाल र भारतसहित दक्षिण एसियाका विभिन्न देश तथा भारतका विभिन्न प्रान्तहरुबाट विभिन्न क्षेत्रका प्रतिष्ठित व्यक्ति तथा संघसंस्थाहरुको सहभागिता रहेको छ ।
