म्याड्रिड। स्पेनको उत्तर अफ्रिकी क्षेत्र सेउटाको स्थानीय प्रशासनले गत साताको ठूलो आप्रवासी आगमनपछि त्यहाँ रहेका साहाराविहीन बाल आप्रवासीको सङ्ख्या ‘अस्थिर’ अवस्थामा पुगेको भन्दै केन्द्र सरकारसँग तत्काल सहयोगको माग गरेको छ ।
स्पेनी सरकारका अनुसार जुलाई ३० यता सेउटामा प्रवेश गरेका करिब ७२ हजार आप्रवासीमध्ये ७० हजार जनालाई छिमेकी मोरक्को फर्काइएको छ। तर त्यहाँ अझै करिब दुई हजार ५०० आप्रवासी रहेका छन्, जसमध्ये सयौँ साहाराविहीन नाबालिग छन् ।
उनीहरू सीमित खाना, पानी, आश्रय र सरसफाइ सुविधाका बीच कठिन अवस्थामा बस्न बाध्य छन्। सेउटाका प्रमुख जुआन जेसस भिभासले सार्वजनिक प्रसारक आरटीभीइसँग कुरा गर्दै हाल ९० जनाको क्षमता भएको केन्द्रमा करिब एक हजार १०० नाबालिगको हेरचाह भइरहेको बताउनुभयो ।
“यो अवस्था दीगो हुन सक्दैन,” उहाँले भन्नुभयो, “आश्रय केन्द्रहरू अत्यधिक भरिएकाले सार्वजनिक सुरक्षा र व्यवस्थापनमा गम्भीर चुनौती देखिएको छ ।”
सेउटामा स्पेनी सरकारका प्रतिनिधि मिगुएल एन्जेल पेरेजले पनि अझै धेरै नाबालिग सडकमै रहेको स्वीकार गर्दै उनीहरूको संरक्षणलाई पहिलो प्राथमिकता दिइएको बताउनुभयो ।
भिभासले केन्द्र सरकारमार्फत स्पेनका अन्य क्षेत्रबाट सहयोग आवश्यक रहेको दोहो¥याउँदै सङ्कट व्यवस्थापनमा केन्द्र सरकारको प्रतिक्रिया ढिलो र अपर्याप्त भएको टिप्पणी गर्नुभयो ।
बालअधिकार संस्था ‘सेभ द चिल्ड्रेन’का अनुसार सेउटामा अझै करिब एक हजार असुरक्षित साहाराविहीन नाबालिग रहेका छन्। विद्यमान कानुनी व्यवस्थाअनुसार ती बालबालिकालाई स्पेनका अन्य क्षेत्रमा स्थानान्तरण गर्ने प्रयास भइरहेको छ ।
तर विपक्षी पपुलर पार्टी (पीपी) र आप्रवासनविरोधी दल भोक्सको नेतृत्व रहेका केही क्षेत्रीय सरकारले त्यसप्रति असहमति जनाउने सङ्केत गरेका छन् ।
उपप्रधानमन्त्री कार्लोस कुएर्पोले भने सबै क्षेत्रीय सरकारले कानुनअनुसार आफ्नो दायित्व पूरा गर्नुपर्ने बताउनुभएको छ ।
यसैबीच, युवा तथा बालबालिका मन्त्रालयले सेउटालाई साहाराविहीन नाबालिगको व्यवस्थापनका लागि दुई करोड ५० लाख युरो (करिब दुई करोड ९० लाख अमेरिकी डलर) बराबरको आपत्कालीन सहायता उपलब्ध गराउने घोषणा गरेको छ ।
मन्त्रालयका अनुसार दुई विद्यालयलाई विशेषगरी साहाराविहीन बालिका आप्रवासीका लागि अस्थायी स्वागत केन्द्रमा रूपान्तरण गरिएको छ । रासस/एएफपी)
