काठमाडौं । प्रधानमन्त्री केपी शर्मा ओलीको स्वास्थ्य अवस्था स्थिर भएपछि मात्र मिर्गौला प्रत्यारोपणको निर्णय हुने भएको छ । अझै पनि मिर्गौला प्रत्यारोपण गर्ने वा डायलासिसबाटै काम चलाइरहने भन्ने निक्र्यौल भई नसकेको हो । एपेन्टिसाइटको शल्यक्रियापछि प्रधानमन्त्री ओली १० मंसिरदेखि मनमोहन कार्डियोथोरासिक भास्कुलर एन्ड ट्रान्स्प्लान्ट सेन्टरमा उपचाररत् छन् । उनको स्वास्थ्यका विषयमा विभिन्न टिकाटिप्पणी भइरहेका बेला निजी चिकित्सकले तत्काल प्रत्यारोपणका लागि कुनै निर्णय नभएको जनाएका हुन् ।
तत्कालको अवस्थामा प्रधानमन्त्रीको स्वास्थ्यलाई स्थिर राख्ने प्रयास भइरहेको बताएका छन् । ‘प्रधानमन्त्रीज्यू एउटा मेजर अप्रेसनपछि स्वास्थ्यलाभ गर्दै हुनुहुन्छ, उहाँको स्वास्थ्यलाई स्टेबल बनाउनु मात्र हाम्रो अहिलेको प्राथमिकता हो’, प्रधानमन्त्रीको उपचारमा संलग्न एक चिकित्सकले भने, ‘तुरुन्तै प्रत्यारोपण नगरी नहुने कुनै हतार पनि छैन । पहिले उहाँको स्वास्थ्यलाई स्टेबल बनाऔँ, त्यसपछि मात्रै के गर्ने भन्नेबारे छलफल गरौँला ।’ यद्यपि यसबीचमा उनका चिकित्सकले विभिन्न पक्षसँग छलफल भने गरेका छन् ।
ओलीका समस्या र समाधानका विषयमा चिकित्सक र सम्बन्धित पक्षसँग छलफल भने चलिरहेको चिकित्सक स्रोतले जानकारी दिएको छ । १२ वर्षअघि मिर्गौला प्रत्यारोपण गरेका प्रधानमन्त्री ओलीको मिर्गौलामा समस्या देखिएपछि यसबीचमा डायलासिस समेत गरिएको छ । नियमित डायलासिस गर्ने वा मिर्गौला नै प्रत्यारोपण गर्ने भन्नेबारे चिकित्सकहरू कुनै टुंगोमा पुगेका छैनन् । प्रधानमन्त्री ओलीले १६ मंसिरमा अस्पतालबाट दिएको भिडिओ सन्देशमार्फत् मेजर अप्रेसनपछि आफू ठीक हुँदै गएको जानकारी गराएका थिए ।
यता, अस्पतालले भने प्रधानमन्त्री ओलीलाई डिस्चार्ज गर्ने तयारी थालेको छ । ‘प्रधानमन्त्री ओलीको स्वास्थ्य निक्कै राम्रोसँग सुधार आएको छ’, एक चिकित्सकले भने,‘उहाँ अस्पताल भित्रै हिँडडुल र सामान्य अवस्था जस्तै बस्न थाल्नु भएको छ ।’ उनका अनुसार इन्फेक्सन नहोस् भन्नका लागि मात्र अस्पताल राखिएको र एक वा दुई दिन भित्र डिस्चार्ज गरिने बताए ।
सेन्टरका कार्यकारी निर्देशक प्रा.डा.उत्तमकृष्ण श्रेष्ठले पनि प्रधानमन्त्रीको स्वास्थ्यमा निक्कै सुधार भएको जानकारी दिए । ‘उहाँको मिर्गौलालगायत समग्र स्वास्थ्यस्थिति राम्रो रहेको छ, स्वास्थ्यमा उल्लेखनीय सुधार आएको छ, शल्यक्रिया गरिएको घाउ निको हुँदै गएको छ,’ श्रेष्ठले भने । सौर्य दैनिकबाट
