जुम्ला । कर्णाली प्रदेशकै स्वास्थ्य क्षेत्रको स्वास्थ्य हबका रूपमा रहेको जुम्लाको कर्णाली स्वास्थ्य विज्ञान प्रतिष्ठान हाताभित्रै वर्षौदेखि निजी मेडिकल सञ्चालनमा छन् । प्रतिष्ठान हाताभित्र निजी मेडिकल खोल्न नपाइने अदालतको आदेश उल्लंघन गर्दै प्रतिष्ठानमै निजी मेडिकल सञ्चालन गरेर अदालतको आदेशको उल्लंघन गरिएको हो । स्वास्थ्य विज्ञान प्रतिष्ठान हाताभित्र मेडिकल सञ्चालन गर्नु अस्पताल फार्मेसी निर्देशिका २०७० को विपरीत हो ।
तर, निर्देशिका विपरीत निजी फार्मेसी सञ्चालन गरिएका छन् । यति मात्र नभई निजी फार्मेसीले चर्को मूल्यमा औषधि पनि बिक्री गरिरहेको छ । प्रतिष्ठान हाताभित्र बिरामीको सहजताका लागि नेपाल रेडक्रसले ब्लड बैंक स्थापना गरेको थियो । तर, ब्लड बैंकमा कहिल्यै रगत हुँदैन । अहिले पनि प्रतिष्ठानमा रगत अभाव हुँदा नेपाली सेनाको भर पर्नुपर्ने बाध्यता छ । अस्पताल परिसरमा भएका अन्य संघसंस्था र सेवा प्रदायक निकायले स्वास्थ्य विज्ञान प्रतिष्ठानको मातहतमा रहेर काम गर्ने व्यवस्था गरिएको भए पनि उक्त कार्य पूर्ण रूपमा पालन हुन सकेको देखिँदैन ।
उक्त भवनमा ब्लड बैंक स्थापना भए पनि सञ्चालनमा छैन । अस्पताल प्रशासन र रेडक्रसको मिलेमतोमा निजी मेडिकल सञ्चालन गरिँदै आएको छ । यस्तै, अस्पताल हाताभित्र कुनैपनि व्यक्तिलाई भाडा वा ठेक्कामा फार्मेसी खोल्ल नदिने भनी १३ असार २०७२ मा सर्वोच अदालतले आदेशसमेत दिएको थियो । उक्त आदेशमा अस्पतालबाट फार्मेसी सञ्चालन गर्ने, सरकारबाट घोषित निःशुल्क औषधि वितरणको व्यवस्था गर्नुपर्ने बताइएको थियो ।
तर, प्रतिष्ठानले भने उक्त आदेशको विपरीत कार्य गरेको देखिन्छ । प्रतिष्ठानका रजिस्ट्रार विश्वराज काफलेले प्रतिष्ठानले हटाउनका लागि पत्र काटेको बताए । उनले भने, ‘ रेडक्रससँगको सम्झौता भएकाले त्यो रेडक्रसले नै हटाउनुपर्छ ।’ राजधानी दैनिकबाट
