काठमाडौं । चावहिल–साँखु सडक खण्डको ठेक्का सम्झौता भएको चार वर्षमा ६ किलोमिटर मात्रै सडक कालोपत्र भएको छ । सर्वोच्च अदालतको आदेश, काठमाडौं उपत्यका सडक विस्तार आयोजना र ठेकेदारको ढिलासुस्तीका कारण कामले गति लिन नसकेको हो । पानी पर्ने वित्तिकै हिलो र घाम लाग्ने वित्तिकै धुलोको सास्ती खेप्दै आएका स्थानीयले दर्जनौ पटक सडक कालोपत्रे गर्न माग गर्दै आन्दोलन गरे । तर, सडकको अवस्थामा भने सुधार आउन सकेन । चावहिल–साँखुको १२ किलोमिटर सडक विस्तार गरेर चार लेन र दुवैतर्फ फुटपाथ बनाउने योजना २०७२ सालबाट काम अघि सारिएको थियो ।
सोही अनुसार २०७४ सम्ममा सडक विस्तार सक्नेगरी ठेक्का सम्झौता गरिएको थियो । बारम्बार म्याद थप्दा पनि हालसम्म कामले गति लिन सकेको छैन । जसका कारण सर्वसाधारणले हिलो र धुलोको सास्ती खेप्न बाध्य भएका छन् । सो सडक निर्माणका लागि भन्दै नेता तथा मन्त्रीहरूले दर्जनाँै पटक अनुगम गरे तर सो सडकको अवस्थामा भने सुधार आउन सकेको छैन । बिहीबार पूर्वप्रधानमन्त्री तथा नेकपाका वरिष्ठ नेता माधव नेपाल र भौतिक पूर्वाधार मन्त्री बसन्त नेम्वाङसहितको टोली चावहिल साँखु सडक खण्ड अनुगमनमा निस्केका थिए ।
सो अनुगमनका क्रममा चालू आर्थिक वर्षमा सो सडकको काम सम्पन्न गरिसक्ने आश्वासन समेत दिए । यसो त गत वर्ष भौतिक पूर्वाधार तथा यातायातका पूर्व मन्त्री रघुवीर महासेठले पनि चालू आर्थिक वर्षमा सम्पन्न गर्ने आश्वासन नदिएका होइनन् । तर, कामले गति भने दिन सकेन । गत मंगलबार पनि माधवकुमार नेपाल सो सडक अनुगमनमा निस्किएका थिए । सरकार र ठेकेदारको चरम लापारबाहीले सास्ती खेप्न बाध्य भएको स्थानीयको भनाइ छ । सरकार र ठेकेदारको मिलेमतोमा समयमै सडक पिच हुन नसकेको स्थानीय मिलन खड्काको भनाइ छ ।
ठेकेदारले थोरै कामदार ल्याएर काम गराए जस्तो गर्छन् । कहिले चार जना पनि हुँदैनन् । उनले भने, ‘स्थानीयको आँखामा छारो हालेका छन् । सरकार र ठेकेदारकै मिलेमतोले काम हुन सकेको छैन । म्याद थप्दै जाने तर, काम भने गर्न सकेका छैनन् । सडकको खाल्डा समेत पुर्न सकेका छैनन् ।’ कतिपय स्थानमा सडक कालोपत्रे गर्न सुरु गरिएको छ भने कतिपय स्थानमा खाल्डाखुल्डी समेत पुर्ने काम भएको छैन । एक अर्ब ७५ करोडको लगानी काठमाडौं उपत्यका सडक विस्तार आयोजनाका अनुसार एक अर्ब ७५ करोड रुपैयाँको लगानीमा उक्त सडक निर्माण भइरहेको छ ।
सो सडक निर्माणको लागि युनाइटेड बिल्डर्स एन्ड इन्जिनियर्स, बज्रगुरुरच्याङमिला÷खानी जेभि, बज्रगुरु÷बिरुवा÷खानी जेभी र बिटीरसुनकोसीरवल्र्डवाइड जेभी कम्पनीसँग ठेक्का सम्झौता भएको थियो । पछि लामा समानान्तर ठेकेदार थपिएको छ । तर,काम भएको भने देखिँदैन ।सम्झौता अनुसार २०७४ सम्ममा सडक विस्तारको काम सकाउनु पर्ने हो । तर, पनि हालसम्म कामले गति लिन सकेको छैन ।
मापदण्ड अनुसार १८ मिटर सडक र दुर्ई–दुई मिटरको अपांगमैत्री गरी २२ मिटरको सडक बनाउनुपर्ने भए पनि घरधनीले घर नभत्काएका कारण अहिले मापदण्ड घटाएर चुच्चेपाटी अगाडिबाट बौद्धसम्मको करिब एक किमि, जोरपाटी ओरालोबाट नारायणटारसम्मको करिब दुई किमि, र दक्षिण ढोकाबाट थलीसम्मको करिब एक किमिको मात्रै सडक पिच भएको छ । आयोजनाले निर्माण समय सकिए पनि फेरि तिनै कम्पनीलाई काम गर्न दिएकोे छ ।
यस कारण भएन सडक पिच: उक्त सडकमा भएको संरचना हटाउन नसकेको कारणले सडक विस्तार हुन नसकेको हो । सडक विस्तार आयोजनाका अनुसार घरधनीले मुआब्जा नपाएपछि घर भत्काउन नदिँदा सडक कालोपत्रे गर्न सकेका छैनन् । आयोजनाका प्रवक्ता विश्वविजयलाल श्रेष्ठले भने घरधनीले घर नभत्काउँदा र ठेकेदारको ढिलासुस्तीले सडक विस्तारमा समयमा सम्पन्न गर्न नसकेको बताए । ‘अहिले घर नभत्काए पनि पिच गर्ने आदेश आएकाले पिचको काम भइरहेको छ । हाम्रो प्राथमिकता सडक निर्माण हो । हामी निरन्तर लागिपरेका छौँ’ उनले भने ।
९७ करोेडमा ५० प्रतिशत काम:चावहिल–साँखु सडक निर्माणको क्रममा हालसम्म ९७ करोड रूपैयाँ खर्च भइसकेको सडक विस्तार आयोजनाले जनाएको छ । यता सो सडकको कामको गति हेर्दा ५० प्रतिशत मात्रै काम सम्पन्न भएको देख्न्छि । यसरी हेर्दा बजेट खर्चअनुसार कामको गति सुस्त देखिन्छ । सौर्य दैनिकबाट
