समितिले बुझायो प्रतिवेदन
बुटवल । प्रदेशको नाम र राजधानी सिफारिस गर्न बनेको विशेष समितिले नाम र राजधानी सिफारिसको अन्तिम प्रतिवेदन प्रदेशसभा सचिवालयलाई बुझाएको छ । समितिले मंसिर अन्तिम साता भारतको चण्डीगढ र हरियाणा भ्रमण गरी फर्के लगत्तै प्रतिवेदन सचिवालयमा बुझाएको हो । समितिका संयोजक दीपेन्द्र पुनले प्रदेशसभाले दिएको जिम्मेवारी अनुसार म्याद सकिने अन्तिम दिनमा प्रदेशको राजधानी र नामाकरण सिफारिस सहितको प्रतिवेदन संसद् सचिवालयमा बुझाइएको बताए ।
उनले प्रदेशसभामा उक्त प्रस्ताव नजाँदासम्म प्रतिवेदनबारे केही बोल्न नसकिने समेत बताए ।तर, आइतबार मात्र समितिका एक सदस्यले प्रदेश–५ को नाम लुम्बिनी र राजधानी तीन जिल्लाका ६ स्थानमा हुनसक्ने सहितको प्रतिवेदन तयार गरेको बताएका थिए । संयोजक पुनले विभिन्न सञ्चार माध्यममा आएका नामहरू प्रस्तावित नामहरू भएको बताउँदै सबै कुरा प्रदेशसभामा प्रतिवेदन खुला भएपछि मात्र बाहिर आउने बताए ।
आइतबार बसेको समितिको बैठकले प्रतिवेदनलाई अन्तिम रूप दिएको थियो । झण्डै तीन महिनाअघि अन्त्य भएको अधिवेशन प्रदेश सरकारले अझै आह्वान गरेको छैन । प्रतिवेदन प्रदेशसभाको आगामी अधिवेशनमा प्रस्तुत हुनेछ । मुख्यमन्त्री शंकर पोखरेल प्रदेशको राजधानी दाङ हुनुपर्ने अडानमा छन् । नेकपाका महासचिव विष्णु पौडेल बुटवल नै स्थायी राजधानी हुनुुपर्ने अडानमा छन् ।
राजधानीका बारेमा मुख्यमन्त्री र नेकपा महासचिवबीचको विवादकै कारण टुंगो लाग्न नसकेको धेरैको बुझाइ छ । दुई वर्ष पुग्न लाग्दासमेत सरकारले स्थायी राजधानी टुंगो लगाउन नसकेको भन्दै प्रदेश सरकार र प्रदेशसभा आलोचित भइरहेको छ । प्रदेशसभाद्वारा गठित समितिले जिल्लाजिल्लामा पुगेर सुझावसमेत संकलन गरेको थियो । सौर्य दैनिकबाट
