काठमाडौँ। अमेरिकी सिनेटले सिनेटर मार्कवेन मुलिनलाई आन्तरिक सुरक्षा विभाग (डीएचएस) को सचिव पदमा नियुक्त गर्ने प्रक्रियालाई अगाडि बढाएको छ ।
राष्ट्रपति डोनल्ड ट्रम्पले वर्तमान सचिव क्रिस्टी नोएमलाई प्रतिस्थापन गर्ने घोषणा गरेको दुई हप्तापछि यो कदम चालिएको हो । माथिल्लो सदनमा भएको प्रक्रियागत मतदानमा मुलिनको मनोनयनको पक्षमा ५४ र विपक्षमा ३७ मत परेको थियो ।
उहाँको नियुक्तिलाई अन्तिम रूप दिन आगामी केही दिनभित्रै अन्तिम मतदान हुने सम्भावना छ । ४८ वर्षीय मुलिनले ओक्लाहोमा राज्यबाट १० वर्षसम्म तल्लो सदन (हाउस अफ रिप्रिजेन्टेटिभ्स) मा प्रतिनिधित्व गरेपछि सन् २०२३ देखि सिनेटमा सेवा गरिरहनुभएको छ ।
नोएमको नेतृत्वप्रति दुवै दलका सांसदहरूको बढ्दो असन्तुष्टिका बीच मुलिनको मनोनयन आएको हो । यो ट्रम्पको दोस्रो कार्यकालको पहिलो मन्त्रिमण्डल पुनर्गठन समेत हो ।
मिनियापोलिसमा संघीय कानून प्रवर्तन अधिकारीहरूले दुई अमेरिकी नागरिकलाई गोली हानी हत्या गरेपछि नोएममाथि राजनीतिक दबाब बढेको थियो । साथै, हालैका संसदीय सुनुवाइहरूमा उनको फितलो प्रदर्शनले ट्रम्पलाई थप आक्रोशित बनाएको थियो । सिन्ह्वा/ न्युज एजेन्सी नेपाल
