काठमाडौं: पूर्व न्यायाधीश गौरी बहादुर कार्कीको अध्यक्षतामा गठन भएको भाद्र २३ र २४ गतेको घटना सम्बन्धी जाँचबुझ आयोगको प्रतिवेदन सार्वजनिक गर्न माग गरिएको छ।
कानून व्यवसायी तथा नागरिकहरूको एक समूहले प्रधानमन्त्री तथा मन्त्रिपरिषद्को कार्यालय, सिंहदरबारमा निवेदन दर्ता गर्दै आयोगको प्रतिवेदन उपलब्ध गराउन अनुरोध गरेका हुन्।
निवेदनमा उक्त प्रतिवेदन प्रधानमन्त्री कार्यालयमा बुझाइसकेको जानकारी सार्वजनिक सूचनामार्फत प्राप्त भएको तर सरकारी वेबसाइटमा उपलब्ध नभएको उल्लेख गरिएको छ।
निवेदकहरूले उक्त प्रतिवेदन आम नागरिकको चासो र सरोकारको विषय भएकाले अध्ययनका लागि सार्वजनिक हुनुपर्ने बताएका छन्। उनीहरूले सूचनाको हक सम्बन्धी ऐन २०६४ को दफा ३, ४ र ७ अनुसार प्रतिवेदनको प्रतिलिपि वा डिजिटल प्रति उपलब्ध गराउन माग गरेका छन्।
प्रतिवेदन प्राप्त गर्न लाग्ने आवश्यक शुल्क तिर्न आफूहरू तयार रहेको पनि निवेदनमा उल्लेख गरिएको छ।
निवेदन दर्ता गर्नेहरुमा पूर्व सचिव द्वारिकानाथ ढुंगेल, पूर्व प्रशासकहरु सुरेश कुमार पुडासैनी, चिरन शम्शेर थापा, विवेक कुमार शाह, भाइराजा पाण्डे, सन्त बहादुर पुन, देवीराम शर्मा, रबिराज थापा, सुरेश राज चालिसे लगायत हुनुहुन्छ ।
